پاکستان اور بھارت کے درمیان ممکنہ ایٹمی تصادم کو ٹال دیا ، امریکی صدر

واشنگٹن ڈی سی (ڈیلی اردو)امریکی صدر ڈونلڈ ٹرمپ نے دعویٰ کیا ہے کہ ان کی سفارتی کوششوں کے نتیجے میں جنوبی ایشیا کے دو ایٹمی طاقتوں، پاکستان اور بھارت، کے مابین ایک ممکنہ خطرناک جوہری تصادم روکا جا سکا۔

وائٹ ہاؤس میں صحافیوں سے گفتگو کرتے ہوئے صدر ٹرمپ نے کہا کہ دونوں ممالک کے درمیان حالیہ شدید کشیدگی کے دوران امریکی مداخلت نہ ہوتی تو صورتحال ایک بڑی تباہی کی شکل اختیار کر سکتی تھی۔ ان کا کہنا تھا، “یہ ایک بہت بری جوہری جنگ بن سکتی تھی، جس میں لاکھوں جانوں کا نقصان ہوتا۔ مجھے اس بات پر فخر ہے کہ ہم نے یہ تنازعہ ٹالنے میں کردار ادا کیا۔”

ذرائع کے مطابق، امریکہ نے دونوں ممالک پر دباؤ ڈالا کہ وہ کشیدگی کم کرنے کے لیے فوری اقدامات کریں، بصورت دیگر اقتصادی پابندیوں کا سامنا کرنا پڑ سکتا تھا۔ پاکستانی حکومت نے امریکی کردار کو سراہا، جبکہ بھارتی حکومت کی طرف سے اس پر محتاط ردعمل سامنے آیا۔

سیز فائر کے بعد، دونوں ممالک کی سرحدوں پر امن قائم ہو چکا ہے۔ بھارتی میڈیا کے مطابق، پیر کے روز دونوں ملکوں کے ڈائریکٹر جنرل ملٹری آپریشنز (ڈی جی ایم اوز) کے درمیان رابطہ ہوا، جس میں سرحدی صورتحال پر تبادلہ خیال کیا گیا۔ بھارتی حکام کے مطابق گزشتہ رات لائن آف کنٹرول اور دیگر حساس علاقوں میں مکمل طور پر سکون رہا۔

صدر ٹرمپ نے یہ بھی کہا کہ امریکہ پاکستان اور بھارت دونوں کے ساتھ تجارتی تعلقات بہتر بنانے کے لیے تیار ہے، اور اس حوالے سے بات چیت جاری ہے۔