پاکستان میں نومبر میں دہشت گردی کے واقعات میں ریکارڈ اضافہ، 54 افراد ہلاک

اسلام آباد (نمائندہ ڈیلی اردو) پاکستان میں نومبر 2025 کے دوران دہشت گردی کے واقعات میں اضافہ ریکارڈ کیا گیا، اور دہشت گرد گروہوں کی حکمت عملی میں واضح تبدیلی دیکھی گئی۔ 

رپورٹ کے مطابق کالعدم تحریک طالبان پاکستان (فتنہ الخوارج) اور کالعدم بلوچ لبریشن آرمی (فتنہ الہندوستان) کے دہشت گرد اب عام شہریوں کو سافٹ ٹارگٹس کے طور پر نشانہ بنا رہے ہیں، جس کے نتیجے میں شہریوں کی ہلاکتوں میں نمایاں اضافہ ہوا ہے۔

اسلام آباد کے تھنک ٹینک پاکستان انسٹیٹیوٹ فار کنفلیکٹ اینڈ سکیورٹی سٹڈیز (PICS) کی رپورٹ کے مطابق نومبر میں ملک بھر میں دہشت گردی کے 97 واقعات رپورٹ ہوئے، جو اکتوبر میں 89 تھے۔ عام شہریوں کی اموات نومبر میں 54 ہوئیں، اکتوبر میں 30 تھیں، یعنی 80 فیصد اضافہ۔

رپورٹ میں مزید بتایا گیا کہ نومبر میں 25 سکیورٹی اہلکار اور 7 امن کمیٹیوں کے ارکان بھی ہلاک ہوئے، جبکہ زخمی ہونے والوں میں 83 سکیورٹی اہلکار، 67 عام شہری اور 4 امن کمیٹی ارکان شامل ہیں۔

سکیورٹی فورسز نے نومبر میں سخت اور نپی تلی کارروائیاں کیں، جس کے نتیجے میں 206 عسکریت پسند مارے گئے۔ ان میں سے 137 خیبر پختونخوا کے جنوبی اضلاع اور 58 سابقہ فاٹا کے علاقے میں ہلاک ہوئے۔

رپورٹ میں یہ بھی بتایا گیا کہ نومبر میں خودکش حملوں میں اضافہ ہوا، جن میں چار خودکش حملے ریکارڈ کیے گئے، جبکہ اکتوبر میں صرف ایک خودکش حملہ ہوا تھا۔ نومبر کے خودکش حملے اسلام آباد، پختونخوا، بلوچستان اور سابقہ فاٹا میں ہوئے۔

سالانہ جائزے کے مطابق، 2025 اب تک عسکریت پسندوں کے لیے 2015 کے بعد کا سب سے برا سال رہا، اور جنوری سے نومبر تک 1,940 دہشت گرد مارے گئے۔

واضح رہے کہ حکومت پاکستان کالعدم تحریک طالبان پاکستان (ٹی ٹی پی) کے عسکریت پسندوں کے لیے اصطلاح "فتنہ الخوارج" اور کالعدم بلوچ شدت پسند گروہوں کے لیے "فتنہ الہندوستان" استعمال کرتی ہے۔