پاکستان نے 16 دفاعی تنصیبات کو نشانہ بنایا، میزائل ناکارہ بنائے گئے، بھارتی فوج کا دعویٰ

نئی دہلی (ڈیلی اردو رپورٹ) بھارت کے زیر انتظام کشمیر کے جنوبی علاقے جموں سمیت پونچھ، کپواڑہ، ادھم پور اور پٹھان کوٹ میں صورتحال گزشتہ رات سے شدید کشیدہ ہو چکی ہے، جہاں بھارتی حکام نے پاکستان پر متعدد میزائل اور راکٹ حملوں کا الزام عائد کیا ہے۔

بھارتی فوج کے ترجمان کے مطابق، رات گئے پاکستان نے جموں، ادھم پور اور انڈین پنجاب کے پٹھان کوٹ میں بھارتی فوجی تنصیبات پر راکٹ اور میزائل داغے، جنھیں جدید دفاعی نظام کے ذریعے ناکارہ بنایا گیا۔ ترجمان نے دعویٰ کیا کہ یہ حملے بھارت کی 16 دفاعی تنصیبات کو نشانہ بنانے کے لیے کیے گئے تھے۔

ادھر پاکستان نے ان الزامات کی تردید کرتے ہوئے کہا ہے کہ وہ سرحد پار کسی بھی حملے میں ملوث نہیں۔

لائن آف کنٹرول پر شدید گولہ باری، ہلاکتیں اور زخمی

گزشتہ رات لائن آف کنٹرول (ایل او سی) کے قریب واقع پونچھ میں شدید شیلنگ کے نتیجے میں ایک شہری محمد ابرار ہلاک اور ایک خاتون شاہدہ اختر زخمی ہوئیں، جو اس وقت ضلع ہسپتال منڈی میں زیر علاج ہیں۔

اسی طرح کپواڑہ اور بالا مولا میں بھی شدید گولہ باری کی اطلاعات موصول ہوئیں، جن میں کچھ عمارتوں کو نقصان پہنچا۔ اڑی میں محکمہ صحت کے ایک اہلکار کے مطابق، شیلنگ سے ایک خاتون نرگس بیگم ہلاک ہو گئیں۔

عوام میں خوف، تعلیمی ادارے بند، بجلی منقطع

حالات کی سنگینی کے پیشِ نظر بھارتی فوج نے ریڈ الرٹ جاری کرتے ہوئے جموں و کشمیر میں تمام اضلاع میں بلیک آؤٹ نافذ کیا، جس کے نتیجے میں رات بھر بجلی منقطع رہی اور شہری شدید خوف و ہراس کا شکار رہے۔

حکام نے تمام تعلیمی ادارے دو روز کے لیے بند کر دیے ہیں، جبکہ جاری امتحانات کو بھی ملتوی کر دیا گیا ہے۔

ڈرون حملوں اور سیزفائر خلاف ورزیوں کا الزام

بھارتی وزارت دفاع کے مطابق، 8 اور 9 مئی کی درمیانی شب پاکستان نے مغربی سرحد پر متعدد مقامات پر ڈرونز اور دیگر ہتھیاروں سے حملے کیے، جنھیں مؤثر طریقے سے ناکام بنا دیا گیا۔

بیان میں مزید کہا گیا ہے کہ ایل او سی پر سیزفائر کی متعدد خلاف ورزیاں بھی ہوئیں، جن کا بھارتی افواج نے بھرپور جواب دیا۔