پاکستان کا بھارت کا ایک دوسرے پر جنگ بندی کی خلاف ورزی کا الزام ، گولہ باری جاری

اسلام آباد + نئی دہلی (ڈیلی اردو ) بھارتی سیکریٹری خارجہ وکرم مسری نے کہا ہے کہ پچھلے چند گھنٹوں کے دوران پاکستان کی جانب سے بار بار اس جنگ بندی کی خلاف ورزی کی جا رہی ہے جس پر اسی شام کو پاکستان اور بھارت کے ڈی جی ایم اوز میں اتفاق ہوا تھا۔

پاکستانی وقت کے مطابق ہفتہ کی شب ساڑھے 10 بجے کے بعد پریس کانفرنس کرتے ہوئے وکرم مسری کا کہنا تھا کہ بھارتی مسلح افواج جنگ بندی کی ان خلاف ورزیوں کا مناسب جواب دے رہی ہیں، اور ہم نے ان کا سنجیدہ نوٹس لیا، ہم پاکستان سے مطالبہ کرتے ہیں کہ وہ جنگ بندی کی ان خلاف ورزیوں کا معاملہ حل کرنے کیلئے مناسب اقدام کرے۔

بھارتی سیکریٹری خارجہ نے کہاکہ بھارتی افواج کو سخت جواب دینے کے لیے کہا گیا ہے۔

ادھر دوسری جانب پاکستان میں مقامی ذرائع سے موصول اطلاعات کے مطابق بہاولپور میں دھماکوں کی آوازیں سنی گئی ہیں۔ پشاور میں بھی ہفتہ کی شب دھماکے سنائی دیئے جن کے ساتھ فائرنگ بھی ہوئی۔ تاہم یہ واضح نہیں کہ ان کا تعلق پاک بھارت کشیدگی سے ہے یا نہیں۔

پاکستان اور بھارت کے درمیان سیزفائر کے باوجود مقبوضہ کشمیر کے شہر سرینگر میں دھماکوں کی اطلاعات موصول ہوئی ہیں۔ مقبوضہ کشمیر کے وزیرِاعلیٰ عمرعبداللہ نے کہا کہ سیز فائر کے اعلان کے باوجود سرینگر میں متعدد دھماکوں کی آوازیں سنی گئیں۔

سرینگر میں موجود روائٹرز کے نامہ نگار ریاض مسرور کے مطابق شہر میں دھماکوں کی آوازیں سنائی دیں، تاہم حکام نے ابھی تک دھماکوں کی نوعیت یا ان کے مقام کے بارے میں کوئی تفصیلات فراہم نہیں کیں۔

یہ دھماکے اس وقت رپورٹ ہوئے ہیں جب امریکہ کی ثالثی سے پاکستان اور بھارت کے درمیان چار روزہ کشیدگی کے بعد سیزفائر کا اعلان کیا گیا تھا۔

دونوں ممالک کی فوجوں نے پاکستانی وقت کے مطابق شام ساڑھے 4 بجے بھارتی وقت کے مطابق 5 بجے لڑائی روکنے پر اتفاق کیا تھا

اس کے کئی گھنٹے بعد امریکی ٹی وی سی این این نے آزاد کشمیر کے شہر بھمبر میں دھماکوں کی اطلاع دی۔ سی این این کے مطابق درجنوں دھماکے سنے گئے اور مقامی سرکاری ذرائع نے بتایا کہ بھارت نے کنٹرول لائن کے پار سے حملہ کیا ہے۔