پاکستان کی سعودی عرب میں آئل پائپ لائن پر ڈرون حملے کی شدید مذمت

اسلام آباد (نیوز ڈیسک) پاکستان نے سعودی عرب میں آئل پائپ لائن پر ڈرون حملے کی شدید مذمت کر دی ہے، ترجمان دفتر خارجہ نے کہا ہے کہ پاکستان سعودی عرب کے ساتھ ہے۔

تفصیلات کے مطابق سعودی عرب میں منگل کے روز آئل پائپ لائن پر ڈرون حملے کی پاکستان نے مذمت کر دی ہے۔

ترجمان دفتر خارجہ نے کہا کہ پاکستان سعودی عرب سے مکمل یک جہتی کا اظہار کرتا ہے، کسی بھی بیرونی جارحیت کے خلاف سعودی عرب کے ساتھ ہیں۔

دفتر خارجہ کا کہنا تھا کہ پاکستان دہشت گردوں کی ہر طرح سے مذمت کرتا ہے، پاکستان انسداد دہشت گردی کے لیے سعودی عرب اور اقوام عالم سے تعاون کرتا رہے گا۔

واضح رہے کہ گزشتہ روز سعودی عرب میں تیل کی تنصیبات اور پائپ لائنوں پر دہشت گردوں نے ڈرون حملہ کیا تھا، حملے میں کوئی جانی نقصان نہیں ہوا البتہ پمپنگ اسٹیشن کے ایک حصے میں معمولی آگ بھڑک اٹھی۔

سعودی عرب کے وزیر توانائی خالد الفالح کا کہنا تھا کہ تیل کی تنصیبات کو ڈرون سے نشانہ بنایا گیا جس کے لیے ڈرون میں بارود بھرا گیا تھا۔

ڈرون کو تحویل میں لے کر تحقیقات کا آغاز کر دیا گیا ہے۔

خالد الفالح نے کہا کہ یہ ڈرون حملے دنیا کو تیل کی رسد روکنے کے لیے کیے گئے ہیں مگر سعودی عرب کی تیل پیداوار اور برآمدات بلا تعطل جاری ہیں۔