پشاور میں نامعلوم افراد کی فائرنگ سے ایک پولیس اہلکار ہلاک، دوسرا شدید زخمی

پشاور (ڈیلی اردو) صوبہ خیبر پختونخوا کے صوبائی دارالحکومت میں پولیس پر نامعلوم مسلح افراد کی فائرنگ سے ایک اہلکار ہلاک جبکہ دوسرا شدید زخمی ہوگیا.

تفصیلات کے مطابق تھانہ ریگی کی حدود میں نامعلوم افراد کی فائرنگ سے دو پولیس اہلکار شدید زخمی ہوگئے۔

پولیس اہلکار عدنان اور مرسلین ڈی اے آر میں ڈیوٹی سرانجام دینے کے بعد گھر واپس جارہے تھے کہ چمن کورونہ کے قریب نامعلوم ملزمان نے فائرنگ کردی۔

فائرنگ کے نتیجے میں دونوں پولیس اہلکار شدید زخمی ہوگئے۔

اطلاع ملتے ہی پولیس افسران مقامی پولیس کے ہمراہ فوری موقع پر پہنچ گئے اور دونوں زخمی اہلکاروں کو ابتدائی طبی امداد کی خاطر ہسپتال منتقل کردیا ہے۔ اس دوران زخمی پولیس اہلکار مرسلین ہسپتال میں دورانِ علاج زخموں کی تاب نہ لاتے ہوئے دم توڑ گیا۔

شہر میں جگہ جگہ ناکہ بندیوں پر چیکنگ مزید سخت کر دی گئی ہے۔

پولیس اہلکار مرسلین کی نماز جنازہ پورے سرکاری اعزاز کے ساتھ ملک سعد شہید پولیس لائن پشاور میں ادا کر دی گئی۔

نماز جنازہ میں ایس ایس پی آپریشنز کاشف آفتاب عباسی، ایس ایس پی انوسٹی گیشن محمد اشفاق احمد، دیگر پولیس افسران، سی ٹی ڈی حکام، ضلعی انتظامیہ کے افیسرز سمیت ان کے لواحقین اور پولیس افسران واہلکاروں نے کثیر تعداد میں شرکت کی۔