پشاور میں پاراچنار کے مسافروں کی گاڑی پر فائرنگ، ایک شخص ہلاک، 4 زخمی

پشاور (ڈیلی اردو) صوبہ خیبر پختونخوا کے صوبائِی دارالحکومت پشاور میں رنگ روڈ باڑہ پُل کے قریب فائرنگ کا واقعہ پیش آیا جس میں ایک شخص ہلاک جبکہ 4 افراد زخمی ہوگئے۔

https://twitter.com/ShabbirTuri/status/1716721405122015686?t=ocfmaivV3t-b_VM_sUTeSg&s=19

پولیس کے مطابق تھانہ بڈھ بیر کی حدود نزد باڑہ پل پر بیرون ملک سے آئے مسافروں کی گاڑی پر نامعلوم موٹر سائیکل سواروں نے فائرنگ کی، جس میں عارف حسین نامی شخص ہلاک اور جبکہ اقتدار حسین، عارف نظر، محمدی حسین ساکنان پاراچنار اور ایک راہ گیر وحدت ولد مراد بازید خیل زخمی ہوگئے۔

پولیس کے مطابق یہ ٹارگٹ کلنگ کا واقعہ ہے جس میں طوری قبیلے سے تعلق رکھنے والے افراد کو نشانہ بنایا گیا۔

ابتدائی اطلاعات کے مطابق قطر سے آنے والے افراد کا تعلق پارا چنار سے تھا۔ طوری قبیلے سے تعلق رکھنے والے افراد کا تعلق شیعہ مسلک سے ہے.

واقعے کی اطلاع ملتے ہی پولیس فوری طور پر جائے وقوع پر پہنچی اور لاش کو پوسٹ مارٹم جبکہ زخمیوں کو علاج معالجہ کے لیے ہسپتال منتقل کیا۔ پولیس نے فائرنگ کے واقعے کی مختلف پہلوؤں کو پیش نظر رکھتے ہوئے تفتیش شروع کردی ہے۔

ریسکیو 1122 کے مطابق فائرنگ میں زخمی ہونے والے 4 افراد کو لیڈی ریڈنگ ہسپتال پشاور منتقل کیا گیا، تاہم ایک شدید زخمی شخص جانبر نہیں ہو سکا۔