پشاور میں پولیس اسٹیشن پر دستی بم حملہ، باجوڑ میں بارودی مواد ناکارہ بنا دیا گیا

پشاور/باجوڑ (نمائندگان ڈیلی اردو) پاکستان کے صوبہ خیبر پختونخوا میں دہشت گردی کے دو الگ واقعات میں پشاور کے تھانہ انقلاب پر دہشت گردوں نے دستی بم سے حملہ کیا، جبکہ باجوڑ میں پولیس نے بروقت کارروائی کرتے ہوئے بارودی مواد ناکارہ بنا کر دہشت گردی کی ممکنہ کوشش ناکام بنا دی۔

پولیس کے مطابق پشاور میں موٹر سائیکل پر سوار تین دہشت گردوں نے تھانہ انقلاب پر دستی بم پھینکا اور فرار ہونے کی کوشش کی۔

پولیس اہلکاروں نے فوری طور پر جوابی فائرنگ کی، جس کے بعد دہشت گرد موٹر سائیکل پر فرار ہوگئے۔ 

واقعے کے بعد پولیس نے علاقے میں سکیورٹی بڑھا دی اور حملہ آوروں کی گرفتاری کے لیے سرچ آپریشن شروع کردیا۔

پولیس کے مطابق دستی بم حملے میں کسی جانی نقصان کی اطلاع نہیں ملی۔

دوسری جانب قبائلی ضلع باجوڑ میں پولیس نے تھانہ نواگئی کی حدود میں بارودی مواد برآمد کرکے اسے محفوظ طریقے سے ناکارہ بنا دیا۔

پولیس کے مطابق بارودی مواد کی موجودگی کی اطلاع ملتے ہی بم ڈسپوزل اسکواڈ (بی ڈی ایس) کی ٹیم فوری طور پر موقع پر پہنچ گئی۔ 

پولیس نے علاقے کو گھیرے میں لے کر آمدورفت محدود کردی، جس کے بعد بی ڈی ایس ٹیم نے بارودی مواد کو محفوظ طریقے سے ناکارہ بنا دیا۔

پولیس کا کہنا ہے کہ بروقت کارروائی کے باعث دہشت گردی کی ممکنہ بڑی کارروائی، جانی نقصان اور مالی نقصان سے بچاؤ ممکن ہوا۔

واقعے کے بعد پولیس نے علاقے میں سرچنگ اور نگرانی مزید سخت کردی ہے جبکہ بارودی مواد نصب کرنے والے دہشت گردوں کا سراغ لگانے کے لیے تحقیقات شروع کردی گئی ہیں۔

خیبر پختونخوا میں حالیہ دنوں کے دوران پولیس اور سکیورٹی تنصیبات کو دہشت گردی کے مختلف واقعات میں نشانہ بنایا جاتا رہا ہے، جس کے باعث حساس مقامات پر سکیورٹی اقدامات مزید سخت کیے گئے ہیں۔