پشاور میں پولیس موبائل پر بم حملہ، دو اہلکار زخمی

پشاور (نمائندہ ڈیلی اردو) پاکستان کے شورش زدہ صوبہ خیبر پختونخوا کے دارالحکومت پشاور میں پیر زکوڑی موڑ کے قریب پولیس کی موبائل وین کو دیسی ساختہ بم (آئی ای ڈی) حملے کا نشانہ بنایا گیا، جس کے نتیجے میں دو پولیس اہلکار زخمی ہو گئے۔

پولیس کے مطابق دھماکہ اس وقت ہوا جب پولیس موبائل معمول کی گشت پر تھی۔ دھماکے سے موبائل وین کو جزوی نقصان پہنچا جبکہ اس میں سوار دو اہلکار معمولی زخمی ہوئے۔

زخمی اہلکاروں کو فوری طور پر قریبی اسپتال منتقل کر دیا گیا، جہاں انہیں طبی امداد فراہم کی جا رہی ہے۔ پولیس حکام کا کہنا ہے کہ دونوں اہلکاروں کی حالت خطرے سے باہر بتائی جا رہی ہے۔

واقعے کے فوراً بعد پولیس اور قانون نافذ کرنے والے اداروں کی بھاری نفری جائے وقوعہ پر پہنچ گئی اور علاقے کو گھیرے میں لے کر شواہد اکٹھے کرنے کا عمل شروع کر دیا گیا۔ بم ڈسپوزل یونٹ اور فرانزک ٹیمیں بھی دھماکے کی نوعیت اور استعمال ہونے والے دھماکا خیز مواد کے بارے میں تحقیقات کر رہی ہیں۔

پولیس کا کہنا ہے کہ حملہ آوروں کی شناخت اور گرفتاری کے لیے تحقیقات کا آغاز کر دیا گیا ہے، جبکہ علاقے میں سرچ آپریشن بھی جاری ہے۔

تاحال کسی گروپ یا تنظیم نے حملے کی ذمہ داری قبول نہیں کی ہے۔