پنجاب: اٹک میں جے یو آئی رہنما قاری نظام الدین نامعلوم افراد کی فائرنگ سے ہلاک

اٹک (نمائندہ ڈیلی اردو) صوبہ پنجاب کے ضلع اٹک میں جمعیت علمائے اسلام (جے یو آئی) کے تحصیل نائب امیر قاری نظام الدین نامعلوم افراد کی فائرنگ سے ہلاک ہو گئے۔

یہ واقعہ اس وقت پیش آیا جب وہ جامعہ علوم الشریعہ جامع مسجد لوہاراں میں نماز تراویح کے بعد قرآن سنانے کے بعد موٹر سائیکل پر گھر جا رہے تھے۔ پیپلز کالونی سے متصل خٹک کالونی میں مسلح افراد نے اندھا دھند فائرنگ کی، جس کے نتیجے میں وہ موقع پر ہی ہلاک ہو گئے۔

واقعے کی اطلاع ملتے ہی پولیس اور ریسکیو 1122 کی ٹیمیں موقع پر پہنچ گئیں اور قاری نظام الدین کی لاش کو پوسٹ مارٹم کے لیے ڈسٹرکٹ ہیڈ کوارٹر اسپتال اٹک منتقل کر دیا گیا۔ جے یو آئی کے مقامی رہنما اور بڑی تعداد میں شہری اسپتال پہنچ گئے، جہاں شدید غم و غصے کا اظہار کیا گیا۔

جمعیت علمائے اسلام کی مرکزی قیادت نے اس واقعے کو ٹارگٹ کلنگ قرار دیتے ہوئے احتجاج کیا اور قاتلوں کی فوری گرفتاری کا مطالبہ کیا۔ قاری نظام الدین نماز تراویح کی امامت کے علاوہ فاروق اعظم کالونی میں ایک دینی مدرسہ بھی چلا رہے تھے۔

اس واقعے کے بعد ضلع بھر میں خوف و ہراس کی فضا قائم ہو گئی ہے، جبکہ شہریوں اور مذہبی رہنماؤں نے حکومت سے فوری کارروائی کا مطالبہ کیا ہے۔