پنجاب میں سی ٹی ڈی کی کارروائیاں، ٹی ٹی پی کمانڈر سمیت 11 دہشت گرد گرفتار

لاہور (بیورو رپورٹ) کاؤنٹر ٹیررازم ڈیپارٹمنٹ (سی ٹی ڈی) نے پنجاب کے مختلف شہروں میں خفیہ اطلاعات پر کارروائیاں کرتے ہوئے کالعدم تنظیم کے کمانڈر سمیت 11 دہشت گردوں کو گرفتار کر لیا۔

ایڈیشنل آئی جی سی ٹی ڈی نے تصدیق کرتے ہوئے کہا ہے کہ لاہور سمیت پنجاب میں انٹیلی جنس بیسڈ آپریشن کے دوران کالعدم تنظیم تحریک طالبان پاکستان کے اہم کمانڈر سمیت 11 دہشتگردوں کو گرفتار کرلیا گیاہے۔

ترجمان سی ٹی ڈی نے ڈیلی اردو کو بتایا کہ لاہور، ساہیوال، سرگودھا، بہاولپور، جھنگ، نارووال اور جہلم میں 135 کارروائیاں کرتے ہوئے 11 دہشت گردوں کو گرفتار کیا گیا۔

ترجمان سی ٹی ڈی کے مطابق افغانستان سے تربیت یافتہ کالعدم تحریک طالبان پاکستان (ٹی ٹی پی) کے اہم کمانڈر کو بہاولپور سے گرفتار کیا۔

ترجمان کے مطابق گرفتار دہشت گردوں میں گل شادین،کاظم، نواب، اسامہ، اعجاز، ظہیر، مصطفیٰ خان اور رسول خان شامل ہیں۔

ترجمان سی ٹی ڈی پنجاب کا کہنا ہے کہ دہشت گردوں سے دھماکہ خیز جیکٹ،آئی ای ڈی بم 2، ڈیٹونیٹر 11،حفاظتی فیوز 17، پرائما کارڈ اور نقدی بھی برآمد کرلی گئی۔

سی ٹی ڈی حکام کا کہنا ہے کہ دہشتگرد مختلف اداروں پر حملے کی منصوبہ بندی کر رے تھے، رواں ہفتے790 کومبنگ آپریشنز کے دوران 80 مشتبہ افراد گرفتار کیے،کومبنگ آپریشنز میں 33546 افراد سے پوچھ گچھ کی گئی،سی ٹی ڈی محفوظ پنجاب کے ہدف پر عمل پیرا ہے۔دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔