چارسدہ: معروف شاعر اور سماجی رہنما میروس جلیا خان ٹارگٹ کلنگ میں ہلاک

چارسدہ (نمائندہ ڈیلی اردو) صوبہ خیبر پختونخوا کے ضلع چارسدہ میں معروف شاعر، ادیب اور سماجی شخصیت میروس جلیا خان کو نامعلوم افراد نے فائرنگ کرکے ہلاک کر دیا۔ یہ واقعہ تھانہ خانمائی کی حدود میں پیش آیا، جہاں موٹر سائیکل پر سوار دو حملہ آوروں نے ان پر گولیاں برسائیں، جس سے وہ موقع پر دم توڑ گئے۔

میروس جلیا خان خدائی خدمتگار تحریک کے رہنما خان عبدالغفار خان کے معتمد ساتھی امیر نواس خان عرف جلیا خان کے صاحبزادے تھے۔ وہ پشتو ادب، تاریخ اور سیاست پر درجن سے زائد کتابوں کے مصنف تھے اور سماجی خدمات میں بھی سرگرم تھے۔

یہ واقعہ چارسدہ میں ایک ہفتے کے دوران ٹارگٹ کلنگ کا دوسرا واقعہ ہے۔ اس سے قبل عمرزئی بازار میں ٹریفک پولیس کے اہلکار سلمان کو بھی نشانہ بنایا گیا تھا۔

ذرائع کے مطابق، ضلع میں چار سے چھ دہشت گردوں کے داخل ہونے کی اطلاعات ہیں، جنہیں اہم شخصیات، سرکاری اہلکاروں اور صحافیوں کو نشانہ بنانے کا ٹاسک دیا گیا ہے، تاہم ضلعی سطح پر اب تک کوئی حفاظتی اقدامات نہیں کیے گئے۔

دوسری جانب، عوامی نیشنل پارٹی سمیت کسی بھی سیاسی جماعت نے دہشت گردی کے خلاف کسی جامع حکمت عملی کا اعلان نہیں کیا، جبکہ حکومت پر امن و امان کی بگڑتی صورتحال سے متعلق خاموش تماشائی کا کردار ادا کرنے کا الزام لگایا جا رہا ہے۔