ڈیرہ اسماعیل خان میں درابن پولیس اسٹیشن پردہشت گردوں کا حملہ

ڈی آئی خان (ڈیلی اردو) صوبہ خیبر پختونخوا کے ضلع ڈیرہ اسماعیل خان کی تحصیل درابن کلاں پولیس اسٹیشن پر دہشت گردوں نے حملہ کردیا۔

تفصیلات کے مطابق ڈیرہ اسماعیل خان میںدرابن پولیس اسٹیشن پر دہشت گردوں نے حملہ کر دیا ہے جس باعث پولیس اور دہشت گردوں کے درمیان فائرنگ کا تبادلہ جاری ہے۔ پولیس جوانوں کی جانب سے بھرپور جوابی کارروائی کی گئی۔

ایس ایچ او عطا اللہ چودری کا کہنا تھا کہ دہشتگردوں کی جانب سے چھوٹے اور بڑے ہتھیاروں کا استعمال کیا گیا پولیس حکام کا کہنا ہے کہ بھاری نفری تھانہ درابن کی طرف روانہ کر دی گئی ہے۔ تاہم کسی قسم کا کوئی نقصان نہیں ہوا۔

خیال رہے کہ کچھ روز قبل بھی ڈیرہ اسماعیل خان میں تھانے پر مسلح افراد نے حملہ کردیاتھاجس میں 2 پولیس اہلکار زخمی ہوگئے تھے اور تھانے کا گیٹ تباہ ہوگیا جبکہ کیمروں اور دیگر املاک کو بھی شدید نقصان پہنچایا گیا تھا۔ ڈیرہ اسماعیل خان کے تھانہ ہتھالہ پر 30 مسلح افراد کا حملہ کردیا، جو ہینڈ گرینیڈ اور راکٹ لانچروں سمیت بھاری ہتھیاروں سے لیس تھے۔

پولیس کے مطابق حملے میں 2 پولیس اہلکار زخمی ہوگئے، تھانے کا گیٹ تباہ ہوگیا، کیمروں اور دیگر املاک کو بھی نقصان پہنچا۔ پولیس کا کہنا ہے کہ مسلح حملہ آور 40 منٹ تک تھانے پر فائرنگ کرتے رہے، پولیس کی جوابی فائرنگ پر حملہ آور فرار ہوگئے تھے۔

یاد رہے کہ کچھ روز قبل ضلع ڈیرہ اسماعیل خان میں نامعلوم افراد کی فائرنگ سے پولیس اہلکار ہلاک ہوگیا تھا۔ یہ افسوسناک واقعہ ڈیرہ اسماعیل خان کے تحصل درابن جوڈیشنل کمپلس کے قریب پیش آیا تھا دہشت گردوں کی فائرنگ سے ہلاک پولیس اہلکار کی شناخت سمیع اللہ کے نام سے ہوئی۔

ریسکیو اہلکاروں نے پولیس اہلکار کی لاش کو پوسٹمارٹم کیلئے ہسپتال منتقل کردیا جبکہ واقعے کی تحقیقات اور ملزمان کی گرفتاری کیلئے کارروائی کا آغاز کردیا گیا تھا۔