ڈیرہ اسماعیل خان میں سیکیورٹی فورسز کا آپریشن، 4 عسکریت پسند ہلاک

راولپنڈی (ک م) پاکستان کے صوبے خیبر پختونخوا کے ضلع ڈیرہ اسماعیل خان کے علاقے مڈی میں سیکیورٹی فورسز نے خفیہ اطلاع پر کارروائی کرتے ہوئے 4 عسکریت پسندوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق، فورسز کو اطلاع ملی تھی کہ علاقے میں شدت پسندوں کی موجودگی ہے، جس پر فوری آپریشن کیا گیا۔ کارروائی کے دوران عسکریت پسندوں کے ٹھکانوں کو نشانہ بنایا گیا۔

آئی ایس پی آر کے مطابق فائرنگ کے تبادلے میں 4 شدت پسند ہلاک ہوئے، جن کے قبضے سے اسلحہ اور گولہ بارود برآمد کر لیا گیا۔ ہلاک ہونے والے عسکریت پسند علاقے میں دہشت گردی کی مختلف کارروائیوں میں ملوث تھے۔

فائرنگ کے تبادلے میں 23 سالہ سپاہی باسط صدیقی بھی ہلاک ہو گئے، جن کا تعلق ضلع اٹک سے تھا۔

ترجمان کے مطابق علاقے میں موجود کسی بھی ممکنہ عسکریت پسند کے خاتمے کے لیے کلیئرنس آپریشن جاری ہے۔

بیان میں کہا گیا ہے کہ پاکستان کی سیکیورٹی فورسز ملک سے دہشت گردی کے خاتمے کے لیے پُرعزم ہیں اور جوانوں کی قربانیاں قوم کے حوصلے اور عزم کو مزید مضبوط کرتی ہیں۔