ڈیرہ اسماعیل خان: پولیس موبائل پر دہشت گردوں کی فائرنگ، افسر سمیت 2 اہلکار ہلاک

ڈیرہ اسماعیل خان (نمائندہ ڈیلی اردو)  پاکستان کے شورش زدہ صوبہ خیبر پختونخوا کے ضلع ڈیرہ اسماعیل خان میں پولیس موبائل پر دہشت گردوں کی فائرنگ کے نتیجے میں 2 پولیس اہلکار ہلاک جبکہ ایک اہلکار زخمی ہوگیا۔

ڈیلی اردو کے مطابق واقعہ تھانہ چودوان کی حدود میں پیش آیا، جہاں گشت پر مامور پولیس موبائل کو دہشت گردوں نے نشانہ بنایا۔ حملہ آوروں نے اچانک پولیس ٹیم پر فائرنگ کی اور موقع سے فرار ہوگئے۔

فائرنگ کے نتیجے میں اسسٹنٹ سب انسپکٹر فقیر محمد اور کانسٹیبل وزیر خان ہلاک ہوگئے، جبکہ ایک پولیس اہلکار کے شدید زخمی ہونے کی اطلاعات ہیں، جسے طبی امداد کے لیے اسپتال منتقل کر دیا گیا ہے۔

واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کو گھیرے میں لے لیا۔ سیکیورٹی فورسز اور پولیس نے حملہ آوروں کی تلاش کے لیے علاقے میں سرچ آپریشن شروع کر دیا ہے۔

پولیس حکام کے مطابق واقعے کی تحقیقات جاری ہیں جبکہ حملے میں ملوث دہشت گردوں کا سراغ لگانے کے لیے مختلف مقامات پر کارروائیاں کی جا رہی ہیں۔

واضح رہے کہ خیبر پختونخوا کے جنوبی اضلاع میں حالیہ عرصے کے دوران پولیس اور سیکیورٹی فورسز پر دہشت گرد حملوں میں اضافہ دیکھنے میں آیا ہے۔