ڈیرہ اسماعیل خان: کلاچی میں پولیس وین کے قریب بم دھماکا، ایک اہلکار شہید، 2 زخمی

ڈی آئی خان (توقیر حسین زیدی) ڈیرہ اسماعیل خان کی تحصیل کلاچی میں پولیس موبائل پر بم دھماکے کے نتیجے میں ایک اہلکار شہید جبکہ دو زخمی ہوگئے۔

پولیس کے مطابق دھماکہ مڈی یوسی کے قریب ہوا۔ پولیس نے بتایا کہ پولیو ٹیموں کی سیکورٹی کے لئے جوانوں کو پہنچایا جارہا تھا کہ اس دوران پولیس موبائل پر دھماکہ ہوگیا۔

دھماکہ میں ایک ہیڈ کانسٹیبل جاں بحق جبکہ دو اہلکار زخمی ہوئے۔ شہید ہونے والے اہلکار کا نام ریاض جبکہ زخمی ہونے والوں میں شکیل اور عطاء اللہ شامل ہے۔ دھماکے کے بعد سیکورٹی فورسز موقع پر پہنچ گئی اور شہید اہلکار کی لاش اور زخمیوں کو ہسپتال منتقل کردیا۔

واقعہ کے بعد قانون نافذ کرنے والے اداروں نے علاقے کو گھیرے میں لے کر سرچ آپریشن شروع کردیا۔