ڈیرہ غازی خان: سیکیورٹی فورسز کا لادی گینگ کے خلاف آپریشن جاری

ڈی جی خان (ویب ڈیسک) صوبہ پنجاب کے ضلع ڈیرہ غازی خان کے قبائلی علاقے تمن کھوسہ میں لادی گینگ کے خلاف سیکیورٹی فورسز کا آپریشن جاری ہے۔

لادی گینگ کے خلاف آپریشن میں قبائلی فورس، بارڈر ملٹری پولیس، پنجاب پولیس اور رینجرز اہلکار حصہ لے رہے ہیں تاہم اب تک کوئی گرفتاری عمل میں نہیں آئی ہے جب کہ ڈاکوؤں نے تیسرا مغوی چھوڑ دیا جو اپنے گھر پہنچ چکا ہے۔

پولیٹیکل انتظامیہ کے مطابق دو روز قبل ڈیرہ غازی خان کے قبائلی علاقے تمن کھوسہ میں لادی گینگ نے تین افراد کو اغوا کیا تھا جس کے بعد خیر محمد نامی مغوی کو فائرنگ کر کے اور محمد رمضان کو تیز دھار آلے سے قتل کردیا تھا جب کہ تیسرے مغوی خادم حسین کو اپنے ساتھ لے گئے تھے تاہم رات گئے ڈاکوؤں نے تیسرے مغوی کو چھوڑ دیا اور وہ اپنےگھر پہنچ گیا۔

آج دوسرے روزبھی قبائلی فورس بارڈر، ملٹری پولیس، پنجاب پولیس اور رینجرز کا مشترکا سرچ آپریش جاری ہے، سیمنٹ فیکٹری کے عقبی پہاڑی سلسلہ اور قبائلی علاقے کشوبہ میں ڈاکوؤں کی تلاش جاری ہے جس میں اب تک کوئی گرفتاری عمل میں نہیں آئی ہے۔