کراچی میں دستی بم حملہ، دو خواتین ہلاک، 6 افراد زخمی

کراچی (ڈیلی اردو) صوبہ سندھ کے صوبائی حکومت کراچی کے علاقے لیاری کی بہار کالونی میں دستی بم حملے میں ایک بچی اور خاتون ہلاک اور دیگر 6 راہگیر زخمی ہوگئے۔

ڈی آئی جی ساؤتھ سید اسد رضا نے نجی ٹی وی چینل ڈان نیوز کو بتایا کہ موٹرسائیکل پر سوار نامعلوم افراد نے کئی ماہ سے بند ایک دکان کے باہر ہینڈ گرینیڈ پھینکا اور موقع سے فرار ہوگئے۔

انہوں نے کہا کہ اس حملے کی وجوہات معلوم کرنے کے لیے تفتیش کی جارہی ہے اور بظاہر یہ بلاوجہ ہونے والا واقعہ ہے۔

ڈی آئی جی نے کہا کہ 7 افراد زخمی ہوگئے تھے تاہم 35 سالہ رضیہ محمد علی زخموں کی تاب نہ لاتے ہوئے دم توڑ گئیں۔

ان کا کہنا تھا کہ زخمی ہونے والے تمام افراد راہگیر تھے اور انہیں ڈاکٹر رتھ فاؤ سول ہسپتال کراچی منتقل کردیا گیا ہے۔

انہوں نے کہا کہ زخمیوں کی شناخت ذوہیب جاوید، خیراللہ، وانش دلیپ کمار، عتیقہ، عادل آدم اور احسان نبی کے نام سے ہوئی ہے۔

زخمی عتیقہ رات گئے ہسپتال میں دم توڑ گئی۔

بعد ازاں سندھ پولیس کے انسپکٹر جنرل (آئی جی) ڈاکٹر رفعت مختار راجا نے ایس ایس پی سٹی سے اس حملے کے حوالے سے تفصیلات طلب کرلیں۔

علاوہ ازیں گورنر سندھ کامران خان ٹیسوری نے بھی واقعے کا نوٹس لیا اور کمشنر کراچی کو ہدایت کی کہ وہ اس حوالے سے آگاہ کریں۔

انہوں نے ہدایت کی کہ واقعے میں زخمی ہونے والے افراد کو ہر ممکن بہتر علاج فراہم کیا جائے۔