کراچی میں دہشتگردی کا بڑا منصوبہ ناکام، ایک دہشت گرد ہلاک، 5 گرفتار

کراچی (ڈیلی اردو) صوبہ سندھ کے صوبائی دارالحکومت کراچی کے علاقے شاہ لطیف ٹاؤن میں کاؤنٹر ٹیررازم ڈپارٹمنٹ (سی ٹی ڈی) کے دہشت گردوں کے ساتھ مقابلے میں ایک دہشت گرد ہلاک اور 5 کو گرفتار کر لیا گیا۔ حکام کا کہنا ہے کہ دہشتگردوں کے زیر استعمال عمارت کو کلیئر کر دیا گیا ہے۔

ڈی آئی جی سی ٹی ڈی راجا عمر خطاب کے مطابق شاہ لطیف ٹاؤن میں ایک عمارت میں دہشت گرد موجود تھے، خفیہ اطلاع پر دہشت گردوں کے خلاف کارروائی کی گئی۔

انہوں نے بتایا کہ دہشت گردوں کے ساتھ فائرنگ کے تبادلے میں ایک ملزم ہلاک ہوا جبکہ 5 کو گرفتار کر لیا گیا۔

ان کا کہنا تھا کہ دہشتگردوں نے ایک رکشہ عمارت کے گیٹ کے سامنے کھڑا کر رکھا تھا جس کے خفیہ خانوں میں بارودی مواد نصب تھا اور دہشتگرد مکمل طور پر کارروائی کے لیے تیار تھے۔

راجا عمر خطاب کا کہنا تھا کہ نیکٹا کی جانب سے کچھ عرصہ قبل الرٹ جاری کیا گیا تھا، اور ہم کافی عرصے سے عمارت کی سرویلنس کر رہے تھے، پولیس مقابلے میں ہلاک اور گرفتار دہشت گردوں کی شناخت کا عمل اور مزید تحقیقات جاری ہیں۔

آپریشن کی نگرانی ڈی آئی جی سی ٹی ڈی عمر شاہد کررہے ہیں، عمر شاہد کا کہنا ہے کہ کارروائی کے دوران دہشت گردوں کی جانب سے پولیس کی بکتر بند پر دستی بموں سے حملہ کیا گیا جس کے بعد اہلکاروں اور دہشتگردوں کے درمیان فائرنگ کا تبادلہ ہوا۔

دہشتگردوں کے قبضے سے 4 عدد کلاشنکوف، 4 عدد خودکش جیکٹس، 15 عدد دستی بم اور بارود سے بھرا رکشہ بھی برآمد کرلیا گیا۔

سی ٹی ڈی حکام کے مطابق تفتیش کی جا رہی ہے کہ دہشتگردوں کا تعلق کس گروپ سے ہے، اہم انکشافات متوقع ہیں۔

ڈی آئی جی سی ٹی ڈی عمر شاہد نے کہا ہے کہ پچھلے 2 ہفتوں سے دہشت گردوں کی شہر میں موجودگی کی اطلاع تھی، حساس اداروں کی فراہم کردہ اطلاعات پر چھاپہ مارا۔

بم ڈسپوزل سکواڈ (بی ڈی ایس) نے مکان سے برآمد بارود سے بھرے رکشے کو ناکارہ بنادیا گیا، دہشتگردوں نے رکشے میں بال بیرنگ، نٹ بولٹ مختلف خانوں میں چھپائے ہوئے تھے تاکہ نقصان زیادہ سے زیادہ ہو۔

جبکہ رکشے میں موجود دھماکہ خیز مواد کو ناکارہ بنا دیا گیا ہے، رکشے میں بال بیئرنگ اور نٹ بولٹس کو مختلف خانوں میں چھپایا گیا تھا۔

سی ٹی ڈی حکام کا کہنا ہے کہ دہشتگردوں کے زیر استعمال عمارت کو کلیئر کر دیا گیا ہے۔