کراچی میں سی ٹی ڈی کی کارروائی، کالعدم تنظیم ایس آر اے سے تعلق رکھنے والا دہشت گرد گرفتار

کراچی (نمائندہ ڈیلی اردو)‏کاؤنٹر ٹیررازم ڈیپارٹمنٹ (سی ٹی ڈی) سندھ نےکراچی کے علاقے سچل میں ایک بڑی کارروائی کرتے ہوئے کالعدم تنظیم ایس آر اے سے تعلق رکھنے والے ایک مبینہ دہشت گرد سجاد شر عرف ببلو ولد غلام عباس کو گرفتار کر لیا۔ ملزم کے قبضے سے غیر قانونی اسلحہ بھی برآمد کیا گیا۔

سی ٹی ڈی سندھ کے ترجمان کے مطابق یہ کارروائی پولیس ہاؤسنگ سوسائٹی اسکیم 33 میمن قبرستان کے قریب انفارمیشن بیسڈ کارروائی کے دوران کی گئی۔ گرفتار ملزم ایس آر اے کے کمانڈرز اصغر علی شاہ اور نور احمد چانڈیو کا قریبی ساتھی ہے اور اس سے قبل بھی وہ قتل، اقدام قتل اور دھماکہ خیز مواد کے مقدمات میں گرفتار ہو چکا ہے۔

ملزم نے ایس آر اے کے کمانڈرز سے ہدایت لے کر دیگر کارکنان غلام شبیر ملاح اور بشیر شرتک تک مواد پہنچایا اور نوجوانوں کو ایس آر اے میں شمولیت اور پارٹی اجتماعات میں شرکت کی ترغیب دیتا تھا۔

ملزم حساس مقامات کی ریکی کر کے اپنے ساتھیوں کو اطلاع فراہم کرتا تھا۔ سی ٹی ڈی کے مطابق ملزم ایس آر اے کمانڈر کی ہدایت پر گاؤن بوہرضلع حیدرآباد کے قریب ریلوے ٹریک پر آئی ای ڈی دھماکے کی منصوبہ بندی کر رہا تھا اور آئی ای ڈی کی ترسیل کا منتظر تھا۔

ملزم سے مزید معلومات حاصل کی جا رہی ہیں اور اس کے خلاف سی ٹی ڈی میں مقدمہ درج کر کے تفتیش شروع کر دی گئی ہے۔