کرم: صدہ میں کار پر فائرنگ، 2 افراد جاں بحق، مظاہرین نے متعدد گاڑیوں کو نذر آتش کردیا

صدہ (نمائندہ ڈیلی اردو) صوبہ خیبر پختونخوا کے قبائلی ضلع کرم کے علاقے صدہ میں پرانی دشمنی کی بنا پر فائرنگ کے نتیجے میں باپ بیٹا جاں بحق ہوگئے۔ مشتعل ہجوم نے لاشیں سڑک پر رکھ کر احتجاجاً مین شاہراہ کو بلاک کردیا اور متعدد گاڑیوں کو نذرِ آتش کردیا۔

تفصیلات کے مطابق ضلع کرم کی تحصیل صدہ کے قریب ذاتی دشمنی کی بنا پر ایک کار پر فائرنگ کی گئی جس کے نتیجے میں لوئرکرم کے علاقے منڈا سے تعلق رکھنے والے عبدالرشید اور اس کے والد فضل رحیم جان بحق ہوگئے۔

نمائندہ ڈیلی اردو کے مطابق ضلع کرم کے علاقے منڈا گاوں کے باپ بیٹا جو کہ آج تاریخ پیشی بھگتنے کے لئے مقامی عدالت آئے تھے جب وہ اپنے کار میں واپس گاوں منڈا جارہے تھے تو صدہ کے علاقے ٹوپکی لوئر کرم، تاک میں بیٹھے مخالف فریق جو موٹر سائیکل پر سوار تھے نے کار پر اندھا دھند فائرنگ شروع کر دی جس کے نتیجے میں فضل رحیم اور عبدالرشید موقع پر ہی جاں بحق ہوگئے۔

عینی شاہدین کے مطابق فائرنگ کے واقعے کے بعد مشتعل ہجوم نے لاشیں صدہ بازار میں سڑک پر رکھ احتجاجاً مین شاہراہ کو بلاک کردیا اور متعدد گاڑیوں کو نذر آتش کردیا۔ 73 بریگیڈ کے کمانڈر نجف عباس کا کہنا ہے کہ واقعہ ذاتی دشمنی ہے اور سیکیورٹی فورسز کے دستے صدہ بازار پہنچ گئے ہیں۔

سرکاری ذرائع کے مطابق لوئر کرم میں ذاتی دشمنی کی بنیاد پر فائرنگ میں باپ بیٹے کی ہلاکت کے بعد صدہ میں اختجاجی مظاہرے میں سڑک بند کر کے اہل تشیع کے گاڑیوں کی توڑ پھوڑ کر کے آگ لگا دی گئی، مقامی دکانداروں اور ضلعی انتظامیہ نے پاراچنار سے تعلق رکھنے والے مسافروں کو مخفوظ مقام پر منتقل کیا جبکہ ضلعی انتظامیہ کے مطابق تمام مسافر اور راہگیر بالکل مخفوظ ہیں اور پاراچنار میں موجود تری منگل سمیت دیگر علاقوں سے تعلق رکھنے والے افراد کو بھی اپنے اپنے علاقوں میں پہنچا دیا ہے۔

پاراچنار کے سیاسی اور سماجی افراد نے حکومت سے مطالبہ کیا ہے کہ صدہ کے قریب ذاتی دشمنی میں دو افراد کے قتل کئے جانے پر احتجاج میں اپر کرم کے اہل تشیع کے گاڑیوں پر حملے، توڑ پھوڑ، جلاوٗ گھیراوٗ اور تشدد کا حکومت سختی سے نوٹس لیں اور واقعہ میں ملوث کالعدم تنظیموں کے منظم افراد کے خلاف سخت قانونی کارروائی کریں جو اس واقعے کو مذہبی منافرت پھیلانے اور ضلع میں امن و امان کی صورتحال کو خراب کرنے کی سازش کر رہے ہیں۔