کرم میں پاکستانی طالبان کا فوجی قافلے پر حملہ، کیپٹن سمیت 6 اہلکار ہلاک، 14 زخمی، ،3 لاپتہ

واشنگٹن  (ش ح ط) پاکستان کے شورش زدہ صوبے خیبر پختونخوا کے قبائلی ضلع کرم میں پاکستانی طالبان کے حملے میں کیپٹن ڈاکٹر نعمان سمیت 6 فوجی ہلاک اور 14 زخمی ہوگئے جبکہ تین اہلکار لاپتہ ہیں۔

ذرائع کے مطابق حملہ سنٹرل کرم کے گاؤں سلطانی میں سکیورٹی فورسز کے قافلے پر کیا گیا۔ دہشت گردوں نے پہلے ایک گاڑی کو بم دھماکے سے نشانہ بنایا اور پھر فائرنگ شروع کر دی۔ حملے کے دوران تین گاڑیاں مکمل طور پر تباہ ہو گئیں۔

پاکستانی فوج کے شعبہ تعلقات عامہ (آئی ایس پی آر) کے مطابق کیپٹن نعمان سلیم میڈیکل آفیسر تھے جنھوں نے اپنی میڈیکل ڈیوٹی کے ساتھ ساتھ ’بہادری سے شدت پسندوں کا مقابلہ کیا۔

آئی ایس پی آر کے مطابق فورسز کی جوابی کارروائی میں کالعدم ٹی ٹی پی کے سات دہشت گرد ہلاک ہوئے جبکہ علاقے میں سرچ آپریشن جاری ہے۔ 

دوسری جانب کالعدم تحریک طالبان پاکستان (ٹی ٹی پی) کے کاظم گروپ نے حملے کی ذمہ داری قبول کر لی ہے۔

وفاقی وزیر داخلہ محسن نقوی اور گورنر خیبرپختونخوا فیصل کریم کنڈی نے کرم کے علاقے میں شدت پسندوں کے خلاف کامیاب آپریشن میں پر سکیورٹی فورسز کو خراج تحسین پیش کیا ہے۔

یاد رہے کہ تین ہفتے قبل بھی اسی علاقے میں دہشت گردوں کے حملے میں لیفٹیننٹ کرنل جنید عارف، میجر طیب راحت سمیت 17 فوجی اہلکار ہلاک ہو چکے ہیں۔

 ضلعی کوآرڈینیٹر شیراز باچا کے مطابق ممکنہ فوجی آپریشن کے پیش نظر مقامی لوگوں کی نقل مکانی جاری ہے اور سکیورٹی فورسز نے متعدد دہشت گردوں کے ٹھکانوں کو تباہ کر دیا ہے۔