کرم: پاک افغان سرحد پر شدت پسندوں کی دراندازی کی کوشش ناکام

پاراچنار (نمائندہ ڈیلی اردو) پاکستان  لع کرم میں سیکیورٹی فورسز نے پاک افغان سرحد پر مسلح افراد کی پاکستان میں داخل ہونے کی کوشش ناکام بنا دی۔

مقامی ذرائع کے مطابق سرحدی علاقے میں مشتبہ نقل و حرکت دیکھنے پر فورسز نے ہلکے اور بھاری ہتھیاروں سے فوری کارروائی کی، جس کے باعث درانداز گھبرا کر افغانستان کی جانب فرار ہو گئے۔ فورسز کے بروقت اقدام سے ممکنہ سیکیورٹی خطرہ ٹل گیا۔

ڈی جی آئی ایس پی آر لیفٹیننٹ جنرل احمد شریف چوہدری نے آج سینئر صحافیوں سے گفتگو میں کہا کہ افغان سیکیورٹی فورسز بعض مواقع پر شدت پسندوں اور اسمگلروں کو فائر کور فراہم کرتی ہیں، اور پاکستانی چوکیوں پر فائرنگ کر کے توجہ ہٹانے کی کوشش کی جاتی ہے تاکہ غیر قانونی عناصر سرحد عبور کر سکیں۔

ذرائع کا کہنا ہے کہ گزشتہ کئی روز سے کرم کی سرحدی پٹی پر غیر معمولی سرگرمیاں دیکھی جا رہی تھیں، تاہم پاکستانی سیکیورٹی اور انٹیلیجنس ادارے صورتحال پر مکمل نظر رکھے ہوئے ہیں۔

سرحدی حکام نے واضح کیا ہے کہ کسی بھی مسلح کارروائی یا مہم جوئی کا سخت اور فوری جواب دیا جائے گا، اور پاکستان اپنی سرحد کے تحفظ کے لیے تمام ضروری اقدامات جاری رکھے گا۔

دہشت گردی کے خلاف کارروائیوں پر بات کرتے ہوئے ڈی جی آئی ایس پی آر نے بتایا کہ رواں سال مجموعی طور پر 67,023 انٹیلی جنس بیسڈ آپریشنز کیے گئے۔ خیبر پختونخوا میں 12,857 اور بلوچستان میں 53,309 کارروائیاں کی گئیں۔ ان کے مطابق اس سال 1,873 دہشت گرد مارے گئے، جن میں 136 افغان شہری بھی شامل ہیں۔