کرک میں سی ٹی ڈی اور پولیس کی مشترکہ کارروائی، ایک دہشت گرد ہلاک

کرک (نمائندہ ڈیلی اردو) ‏کاؤنٹر ٹیررازم ڈیپارٹمنٹ (سی ٹی ڈی) اور پولیس نے شورش زدہ ضلع کرک میں ہائی وے پر ناکہ بندی کرنے والے دہشت گردوں کے خلاف کارروائی کی، جس کے دوران ایک دہشت گرد ہلاک ہوا۔

سی ٹی ڈی خیبر پختونخوا، کوہاٹ ریجن اور ڈسٹرکٹ پولیس کرک نے خفیہ اطلاع پر تخت نصرتی، مدکی روڈ پر دہشت گردوں کے خلاف کامیاب مشترکہ کارروائی کی۔

پولیس کے مطابق علاقے میں مسلح دہشت گرد ناکہ بندی کر کے گزرنے والے مسافروں کی تلاشی لے رہے تھے۔ اطلاع ملنے پر سی ٹی ڈی سوات کی ٹیمیں اور پولیس کی بھاری نفری نے علاقے کا فوری طور پر گھیراؤ کیا۔

پولیس کی موجودگی کا علم ہوتے ہی دہشت گردوں نے فورسز پر اندھا دھند فائرنگ شروع کر دی۔ جواب میں پولیس نے حقِ حفاظتِ خود اختیاری کے تحت مؤثر کارروائی کی، جس کے نتیجے میں ایک دہشت گرد ہلاک ہوا جبکہ باقی ساتھی رات کی تاریکی کا فائدہ اٹھا کر فرار ہو گئے۔

بعد ازاں سرچ اینڈ کلیئرنس آپریشن کے دوران علاقے سے ایک کلاشنکوف، دو میگزین، ایک دستی بم اور متعدد کارتوس برآمد ہوئے۔ پولیس نے اضافی نفری طلب کر کے علاقے کو مکمل طور پر سیل کر دیا اور فرار دہشت گردوں کی گرفتاری کے لیے سرچ آپریشن کے دائرہ کار کو مزید وسیع کر دیا۔

سی ٹی ڈی کے مطابق یہ کارروائی صوبے میں دہشت گردوں کی سرگرمیوں کے خاتمے اور شہریوں کے تحفظ کو یقینی بنانے کے لیے جاری حکمتِ عملی کا حصہ ہے۔