کشمیر: کولگام میں جاری جھڑپوں میں مزید دو بھارتی فوجی اور ایک عسکریت پسند ہلاک

سرینگر  (ڈیلی اردو/اے پی/ڈی پی اے) بھارت کے زیر انتظام کشمیر کے ضلع کولگام کے جنگلاتی علاقے اکھل میں بھارتی فوج اور عسکریت پسندوں کے درمیان آٹھ روز سے جاری مسلح جھڑپوں میں دو بھارتی فوجی اور ایک عسکریت پسند ہلاک ہو گئے ہیں۔

حکام کے مطابق جھڑپوں کا آغاز یکم اگست کو ہوا جب فوج نے عسکریت پسندوں کی موجودگی کی اطلاع پر علاقے کو گھیرے میں لے کر تلاشی شروع کی۔ ابتدائی جھڑپ میں ایک عسکریت پسند مارا گیا اور سات فوجی زخمی ہوئے۔ اس کے بعد وقفے وقفے سے لڑائی جاری رہی جس میں فوج نے ہیلی کاپٹر اور ڈرونز کا استعمال کیا۔

جمعہ کو جھڑپ کے آٹھویں روز دو فوجی ہلاک اور دو زخمی ہوئے۔ بھارتی فوج نے آپریشن کی تصدیق کی ہے لیکن مزید تفصیلات فراہم نہیں کیں۔

کشمیر خطے میں بھارت اور پاکستان کے درمیان کشیدگی جاری ہے جہاں عسکریت پسند آزادی یا پاکستان کے ساتھ الحاق کے لیے سرگرم ہیں۔ 2019 میں کشمیر کی نیم خودمختاری ختم ہونے کے بعد خطے میں سیکیورٹی سخت ہو گئی ہے۔