کوئٹہ میں سیکیورٹی فورسز کا آپریشن، 10 سے زائد دہشت گرد ہلاک

کوئٹہ (ڈیلی اردو ) پاکستان کے شورش زدہ صوبے بلوچستان کے صوبائی حکومت کوئٹہ کے نواحی علاقے میں سیکورٹی فورسز کے آپریشن میں دس سے زائد دہشت گرد ہلاک ہوگئے۔

سیکیورٹی ذرائع کے مطابق کارروائی کالعدم تنظیم بلوچ لبریشن آرمی (BLA) کے کیمپوں کے خلاف کی گئی، مارے گئے تمام افراد کا تعلق بلوچ لبریشن آرمی سے تھا۔

واضح رہے کہ حالیہ مہینوں میں افغانستان سے متصل صوبہ بلوچستان اور خیبرپختونخوا میں دہشت گردی کی لہر میں تیزی کے ساتھ ہی سیکیورٹی فورسز کی کارروائیوں میں بھی اضافہ ہوا ہے۔

30 ستمبر اور یکم اکتوبر کی درمیانی شب سیکیورٹی نے بلوچستان کے دارالحکومت کوئٹہ اور ضلع کیچ میں دو الگ الگ کارروائیوں میں بلوچ لبریشن آرمی کے 13 دہشت گردوں کو ہلاک کر دیا تھا، یکم اکتوبر کو ہی کوئٹہ اور شیرانی میں سیکیورٹی فورسز کے آپریشن میں 18 دہشت گرد ہلاک ہوگئے تھے۔

4 اکتوبر کو خضدار میں سیکیورٹی فورسز کی کارروائی میں بلوچ لبریشن آرمی کے 14 دہشت گرد ہلاک اور 20 سے زائد زخمی ہوگئے تھے۔

17 اکتوبر کو خاران میں پولیس کے قافلے پر حملے میں ایس ایچ او قاسم بلوچ ہلاک ہوگئے تھے، جبکہ 19 اکتوبر کو بلوچستان میں دہشت گردی کی متعدد کارروائیوں میں ملوث بلوچ لبریشن آرمی کا انتہائی مطلوب دہشت گرد سرغنہ جمیل عرف ٹیٹک مارا گیا تھا۔

21 اکتوبر کو سبی میں سی ٹی ڈی کی کارروائی میں 5 دہشت گرد مارے گئے، اور 22 اکتوبر کو بلوچستان کے علاقے دالبندین میں سیکیورٹی فورسز نے کامیاب کارروائی کرتے ہوئے بلوچ لبریشن آرمی کے 6 دہشت گردوں کو ہلاک کر دیا۔