گجرات میں پاک فضائیہ کا تربیتی طیارہ گر کر تباہ، 2 پائلٹ شہید

اسلام آباد (ش ح ط) صوبہ پنجاب کے ضلع گجرات کے پاس پاک فضائیہ کا تربیتی طیارہ گر کر تباہ ہوگیا۔

پاک فوج کے شعبہ تعلقات عامہ (آئی ایس پی آر) کے مطابق تربیتی مشاق طیارہ گرنے سے اس میں سوار دونوں پائلٹ شہید ہوگئے۔

آئی ایس پی آر کا بتانا ہےکہ حادثے میں انسٹرکٹر میجر عمر اور تربیت پانے والے لیفٹیننٹ فیضان شہید ہوئے۔

میجر عمر گجرات اور لیفٹیننٹ فیضان کا تعلق کلرکہار سے تھا۔ آئی ایس پی آر کا کہنا ہے کہ مشاق طیارہ معمول کی تربیتی پرواز پر تھا۔

حادثے کی اطلاع ملتے ہی امدادی ٹیمیں جائے وقوعہ پر پہنچ چکی ہیں۔ حادثہ کی وجوہات جاننے کیلئے ثبوت وشواہد جمع کیے جا رہے ہیں۔

یاد رہے کہ 11 مارچ 2020 کو اسلام آباد میں شکرپڑیاں کے قریب پاک فضائیہ کا ایف-16 طیارہ گر کر تباہ ہوگیا جب کہ اس میں سوار پائلٹ ونگ کمانڈر نعمان اکرم بھی شہید ہوگئے۔

واضح رہے کہ 12 فروری 2020 کو صوبہ خیبر پختونخوا کے ضلع مردان کے علاقے تخت باہی میں پاک فضائیہ کا تربیتی طیارہ گر کر تباہ ہوگیا تھا اور اس واقعے میں پائلٹ محفوظ رہا تھا۔

خیال رہے کہ 7 فروری 2020 کو بھی پاک فضائیہ کا تربیتی طیارہ ضلع جھنگ کی تحصیل شورکوٹ کے قریب گر کر تباہ ہوگیا تھا اور اس واقعے میں بھی پائلٹ محفوظ رہا تھا۔

اس سے قبل 7 جنوری 2020 کو پاک فضائیہ کا طیارہ تربیتی پرواز کے دوران پنجاب کے ضلع میانوالی کے قریب گر کر تباہ ہوگیا تھا اور حادثے کے نتیجے میں طیارے ایف ٹی سیون میں سوار دونوں پائلٹ شہید ہوگئے تھے، جن کے نام اسکواڈرن لیڈر حارث بن خالد اور فلائنگ آفیسر عبادالرحمان تھے۔