ہنگو: قبائلی عمائدین کی کوششوں سے ٹی ٹی پی کی تحویل سے 6 اہلکار بازیاب

واشنگٹن (ڈیلی اردو رپورٹ) پاکستان کے شورش زدہ صوبہ خیبر پختونخوا کے ضلع ہنگو میں خزینہ بانڈہ چیک پوسٹ پر حملے کے بعد کالعدم تحریک طالبان پاکستان (ٹی ٹی پی) کی تحویل میں جانے والے 6 پولیس اہلکار بازیاب کر لیے گئے ہیں۔

پولیس کے مطابق حملے کے دوران حملہ آور اہلکاروں کو اپنی تحویل میں لے گئے تھے۔ بعد ازاں مقامی قبائلی عمائدین کی کوششوں سے ان اہلکاروں کی رہائی ممکن ہوئی۔

پولیس کا کہنا ہے کہ بازیاب کیے گئے تمام اہلکاروں کو دوآبہ پولیس اسٹیشن منتقل کر دیا گیا ہے۔

رہائی پانے والے اہلکاروں میں شاہ زیب خان، مقصود، غنی اکبر، محمد عمران، محمد شہزاد اور مصدق حسین شامل ہیں۔

خیبر پختونخوا پولیس کے مطابق خزینہ بانڈہ چیک پوسٹ پر حملے میں 9 پولیس اہلکار ہلاک اور 26 دیگر زخمی ہوئے، جبکہ پولیس کی جوابی کارروائی میں 15 حملہ آور ہلاک اور متعدد زخمی ہوئے۔

پولیس کے مطابق جھڑپ کے دوران ایک بکتر بند اہلکار بردار گاڑی (اے پی سی) اور پولیس کی متعدد دیگر گاڑیوں کو بھی شدید نقصان پہنچا۔

پولیس نے بتایا کہ اہلکاروں کی بازیابی کے بعد واقعے کی مزید تحقیقات اور قانونی کارروائی جاری ہے۔

واضح رہے کہ خیبر پختونخوا کے ضلع ہنگو میں پولیس اہلکاروں پر گھات لگا کر کیے گئے حملے میں ایک ڈپٹی سپرنٹنڈنٹ آف پولیس (ڈی ایس پی) سمیت 10 اہلکار ہلاک جبکہ تین افسران سمیت 28 زخمی ہوگئے تھے۔