یمن: اسرائیلی فضائی حملے میں حوثی وزیراعظم سمیت متعدد اعلیٰ عہدیدار ہلاک

صنعا + یروشلم (ڈیلی اردو/نیوز ایجنسیاں) اسرائیلی فضائیہ نے جمعرات کو یمن کے دارالحکومت صنعا پر شدید بمباری کی، جس میں حوثی حکومت کے وزیراعظم سمیت متعدد اعلیٰ عہدیدار ہلاک ہوگئے ہیں۔

اسرائیلی فوج نے دعویٰ کیا کہ حملے میں حوثی چیف آف اسٹاف، وزیرِ دفاع اور دیگر اعلیٰ قیادت کو نشانہ بنایا گیا۔

ایران کے حمایت یافتہ حوثی حکومت کے مطابق، وزیراعظم احمد غالب الرحاوی صنعا کے علاقے بیت بوس میں ایک اپارٹمنٹ پر حملے میں ہلاک ہوئے۔ 

انصاراللہ مخالف ذرائع ’الجمہوریہ‘ اور اخبار ’عدن الغد‘ نے بھی احمد الرحاوی کی ہلاکت کی تصدیق کی اور بتایا کہ وہ اپنے قریبی ساتھیوں کے ساتھ ہلاک ہوئے۔ احمد غالب الرحاوی تقریباً ایک سال سے حوثیوں کی حکومت کے وزیراعظم تھے اور انتظامی امور میں سرگرم تھے۔

اس کے علاوہ، حملوں میں حوثیوں کے وزیرِ داخلہ عبد الکریم الحوثی، وزیرِ دفاع محمد العاطفی اور چیف آف اسٹاف محمد الغامری بھی ہلاک ہوئے۔

اسرائیلی فوج نے کہا کہ حملہ ایک فوجی ہدف پر کیا گیا، تاہم فوری طور پر کسی جانی نقصان کی تصدیق نہیں ہوسکی۔ 

یمنی عہدیدار نصر الدین عامر نے بھی دعوے کی تردید کی کہ حملے میں یمنی فوجی قیادت کو نشانہ بنایا گیا۔

یہ حملہ ایسے وقت میں ہوا جب اسرائیل نے حوثیوں کے اعلیٰ فوجی حکام کو نشانہ بنانے کا دعویٰ کیا تھا، مگر حوثی عہدیداروں نے اس دعوے کی ابتدائی طور پر تردید کی تھی۔