یمن: ریاستی سیکیورٹی فورسز کا آپریشن ، داعش کا ترجمان ہلاک، خودکش جیکٹ و دیگر سامان برآمد

صنعاء(ڈیلی اردو) یمن کے مرکزی ادارہ برائے ریاستی سلامتی نے حضرموت کے شہر سیئون میں ایک مشترکہ سیکیورٹی کارروائی کی تفصیلات جاری کرتے ہوئے بتایا ہے کہ آپریشن کے دوران داعش کے ترجمان ابو حذیفہ الانصاری کو ہلاک کر دیا گیا۔

یمنی حکام کے مطابق کارروائی سعودی عرب کی قیادت میں قائم اتحاد کی مشترکہ اسپیشل فورسز اور یمنی انسدادِ دہشت گردی فورس کی 22 ویں یونٹ نے خفیہ معلومات کی بنیاد پر کی۔ حکام کا کہنا ہے کہ مطلوب شخص سیئون میں ایک رہائشی مکان میں موجود تھا، جہاں کارروائی کے دوران اسے نشانہ بنایا گیا۔

ریاستی سلامتی کے ادارے کے مطابق آپریشن انٹیلی جنس معلومات کے تبادلے، نگرانی و جاسوسی کے عمل اور مشترکہ منصوبہ بندی کے نتیجے میں کیا گیا۔ کارروائی کے وقت مکان میں آٹھ عام شہری بھی موجود تھے، جن میں ایک مرد، دو خواتین اور پانچ بچے شامل تھے۔

حکام کے مطابق کارروائی کے دوران مکان میں موجود ایک شخص نے مزاحمت کی اور زخمی ہوا، جسے گرفتار کرنے کے بعد طبی امداد فراہم کی گئی اور محفوظ مقام پر منتقل کر دیا گیا۔

آپریشن کے بعد سیکیورٹی اہلکاروں نے مکان اور اطراف کے علاقے کی تلاشی لے کر شواہد اور دیگر سامان قبضے میں لیا۔ حکام کے مطابق وہاں سے ایک خودکش جیکٹ بھی برآمد ہوئی، جسے شہریوں کے لیے خطرہ ختم کرنے کے لیے ناکارہ بنانے کے بعد محفوظ طریقے سے تلف کر دیا گیا۔

اس کے علاوہ کارروائی کے دوران دو لیپ ٹاپ، پانچ موبائل فون اور دو ٹیبلٹس بھی تحویل میں لیے گئے، جنہیں مزید تحقیقات اور قانونی کارروائی کے لیے متعلقہ اداروں کے حوالے کر دیا گیا۔

یمنی حکام کا کہنا ہے کہ مکان میں موجود خواتین اور بچوں کو بحفاظت باہر نکال کر محفوظ مقام پر منتقل کیا گیا اور انہیں کسی قسم کا نقصان نہیں پہنچا۔ مشن مکمل ہونے کے بعد مشترکہ فورسز علاقے سے واپس چلی گئیں۔

ریاستی سلامتی کے ادارے نے کارروائی کی کامیابی کو مختلف سیکیورٹی اداروں کے درمیان انٹیلی جنس تعاون اور مشترکہ آپریشنل تیاری کا نتیجہ قرار دیا ہے۔ حکام نے واضح کیا کہ دہشت گرد عناصر اور سیکیورٹی اداروں کو مطلوب افراد کے خلاف کارروائیاں جاری رہیں گی اور گرفتار کیے جانے والوں کو قانون کے مطابق عدالتوں کے سامنے پیش کیا جائے گا۔