یمن : حوثی باغیوں پر شہری کو گرفتاری کے بعد فائرنگ کرکے ہلاک کرنے کا الزام

صنعاء (ڈیلی اردو) یمن کی ایک حقوق تنظیم نے ایران نواز حوثی باغیوں پر الزام عائد کیا ہے کہ انہوں نے صوبہ الجوف میں ایک شہری کو گرفتاری کے لیے خود کو ان کے حوالے کرنے کے باوجود فائرنگ کرکے ہلاک کردیا۔

’’منظمہ عدالہ للحقوق والتنمیہ‘‘ کے مطابق محمد عبداللہ اللاغب نامی شہری کو حوثی سکیورٹی اہلکاروں نے تعاقب اور فائرنگ کے بعد اس وقت نشانہ بنایا جب وہ زخمی حالت میں ایک شہری کے خیمے میں موجود اپنے اہل خانہ کے پاس پہنچا تھا۔

تنظیم کے بیان کے مطابق محمد عبداللہ اپنے بھائی کے ہمراہ موٹر سائیکل پر سفر کررہا تھا کہ ایک سکیورٹی چیک پوسٹ پر انہیں روکنے کی کوشش کی گئی۔ بعد ازاں صورتحال تعاقب اور فائرنگ تک پہنچ گئی، جس کے دوران محمد عبداللہ زخمی ہوگیا اور ایک شہری کے خیمے میں پناہ لے لی۔

حقوق تنظیم کا کہنا ہے کہ حوثی اہلکاروں نے خیمے کو گھیرے میں لے کر اسے باہر آنے کا کہا۔ الزام کے مطابق شہری کے خود کو اہلکاروں کے حوالے کرنے کے بعد بھی اس پر براہ راست فائرنگ کی گئی، جس کے نتیجے میں وہ موقع پر ہی ہلاک ہوگیا۔ تنظیم کے مطابق واقعہ خواتین اور بچوں کی موجودگی میں پیش آیا۔

حقوق تنظیم نے اس واقعے کو شہری کے حقِ زندگی کی سنگین خلاف ورزی قرار دیتے ہوئے واقعے کی فوری اور آزادانہ تحقیقات کا مطالبہ کیا ہے۔ تنظیم کا کہنا ہے کہ ذمہ دار اہلکاروں کی شناخت کرکے ان کے خلاف قانونی کارروائی کی جائے اور انہیں احتساب سے بچنے کا موقع نہ دیا جائے۔

تنظیم کے مطابق واقعے کے اثرات متاثرہ خاندان اور موقع پر موجود افراد کے لیے گہرے انسانی اور نفسیاتی نتائج کا باعث بن سکتے ہیں۔