یورپی یونین نے شام کی عدم استحکام کو دہشت گردی کا خطرہ قرار

برسلز ‌(ڈیلی اردو ) یورپی یونین کی ایک داخلی انسداد دہشت گردی رپورٹ کے مطابق، شام میں جاری عدم استحکام یورپ کے لیے سیکیورٹی خدشات کو جنم دے سکتا ہے۔ یہ مسودہ، جو 9 مئی کو تیار کیا گیا اور رائٹرز نے حاصل کیا جس میں کہا گیا کہ خبردار کرتا ہے کہ یورپی یونین اور اس کے رکن ممالک کو دہشت گردی اور پرتشدد انتہا پسندی سے اب بھی نمایاں خطرات لاحق ہیں، اور مجموعی طور پر دہشت گردی کا خطرہ بلند سطح پر برقرار ہے۔

رپورٹ میں کہا گیا ہے کہ شام میں سیکیورٹی کی صورتحال میں تبدیلی سے خطے میں جہادی گروہوں کے دوبارہ سرگرم ہونے کا خدشہ ہے، جو یا تو شام سے یورپ کی جانب نقل مکانی کر سکتے ہیں یا یورپ میں موجود جہادیوں کو دور سے فعال کر سکتے ہیں۔

یہ خدشات ایسے وقت میں سامنے آئے ہیں جب شام میں سابق صدر بشارالاسد کے دسمبر میں اقتدار سے ہٹنے کے بعد نئی عبوری حکومت قائم ہوئی ہے، جس کی قیادت اسلام پسند پس منظر رکھنے والی قیادت کر رہی ہے۔ یورپی حکام نے اگرچہ شام کی نئی قیادت کے حوالے سے محتاط امید کا اظہار کیا ہے، لیکن خاص طور پر شمال مشرقی شام میں جاری غیر یقینی صورتحال پر تشویش پائی جاتی ہے۔

مسودہ رپورٹ میں خبردار کیا گیا ہے کہ “اسلامی/جہادی دہشت گردی یورپی یونین کے لیے سب سے نمایاں خطرہ بنی ہوئی ہے”۔ رپورٹ میں یہ بھی ذکر کیا گیا ہے کہ سیاسی انتقال اقتدار کے دوران انتہا پسند گروہوں کے دوبارہ منظم ہونے یا پہلے سے قید شدت پسندوں کی رہائی کا خطرہ موجود ہے۔

واضح رہے کہ داعش نے 2014 سے 2017 کے درمیان شام اور عراق کے بڑے حصے پر کنٹرول قائم کر کے سخت گیر اسلامی نظام نافذ کیا تھا، اور اب مغربی ممالک کو خطرہ ہے کہ شام میں نئی حکومت کی ملک بھر میں کنٹرول قائم کرنے میں ناکامی ایک بار پھر ان گروہوں کے ابھرنے کی راہ ہموار کر سکتی ہے۔

شمال مشرقی شام میں کرد قیادت کے زیر انتظام داعش سے تعلق رکھنے والے قیدیوں کے کیمپ موجود ہیں۔ نئی حکومت کے بعد ان قیدیوں کی بڑی تعداد میں واپسی کا عمل جنوری سے شروع کر دیا گیا ہے۔

شام کے عبوری صدر احمد الشراء، جو ماضی میں عسکریت پسند گروہ “حیات تحریر الشام” (HTS) کے سربراہ رہ چکے ہیں، اب بھی اقوام متحدہ کی دہشت گردوں کی فہرست میں شامل ہیں۔ HTS ماضی میں القاعدہ سے وابستہ رہا ہے۔

اس کے باوجود، فرانسیسی صدر ایمانویل میکرون نے رواں ماہ احمد الشراء سے ملاقات کے بعد کہا ہے کہ وہ یورپی یونین پر شام پر عائد پابندیاں ختم کرنے کے لیے زور دیں گے۔