یہودی تقریب پر حملہ: ساجد اور نوید اکرم نے فلپائن میں تربیت حاصل نہیں کی، آسٹریلوی پولیس

سڈنی (ڈیلی اردو) آسٹریلوی پولیس نے تصدیق کی ہے کہ بونڈائی ساحل پر یہودی تقریب پر حملے میں ملوث باپ بیٹے ساجد اور نوید اکرم نے کسی دہشت گرد گروہ سے تربیت حاصل نہیں کی تھی اور یہ حملہ انہوں نے انفرادی طور پر کیا۔

پولیس کے مطابق 50 سالہ ساجد اکرم اور 24 سالہ بیٹے نوید اکرم یکم نومبر کو فلپائن پہنچے تھے، جہاں انھوں نے منیلا میں لینڈ کیا اور اگلے دن داواؤ شہر گئے۔ ان کی سڈنی واپسی 29 نومبر کو ہوئی۔

آسٹریلوی پولیس کا کہنا ہے کہ فلپائن میں انہوں نے 14 دسمبر کے حملے کی کوئی تیاری یا تربیت حاصل نہیں کی تھی۔ ابتدائی تحقیقات کے مطابق یہ دونوں افراد مبینہ طور پر اکیلے ہی کارروائی کر رہے تھے اور بہت کم وقت کے لیے ہوٹل سے باہر نکلتے تھے۔

آسٹریلیا میں یہ واقعہ 1996 کے بعد فائرنگ کا سب سے ہلاک خیز واقعہ ہے۔

منگل کو آسٹریلوی فیڈرل پولیس کمشنر کریسی بیریٹ نے کہا کہ فلپائن میں مبینہ حملہ آوروں کی نقل و حرکت کو ٹریک کرنے والی سی سی ٹی وی فوٹیج آسٹریلوی حکام کے حوالے کر دی گئی ہے، اور ابتدائی تجزیے سے ظاہر ہوتا ہے کہ یہ دونوں افراد کسی بڑے دہشت گرد نیٹ ورک کا حصہ نہیں تھے۔

انہوں نے مزید کہا کہ یہ دونوں افراد فلپائن سیاحت کے لیے نہیں گئے تھے، تاہم تحقیقات جاری ہیں اور نئے شواہد سامنے آ سکتے ہیں۔

اس سے قبل آسٹریلوی وزیر اعظم انتھونی البانیز نے کہا تھا کہ دونوں حملہ آور داعش کے نظریات سے متاثر تھے۔

حملے کے بعد ساجد پولیس کی فائرنگ میں ہلاک ہوا جبکہ نوید پولیس کی تحویل میں ہیں اور انہیں قتل اور دہشت گردی کے مقدمات میں اپریل میں عدالت میں پیش کیا جائے گا۔

فلپائن کے امیگریشن بیورو کے مطابق ساجد اکرم نے انڈین پاسپورٹ پر فلپائن میں داخلہ لیا جبکہ نوید کے پاس آسٹریلوی پاسپورٹ تھا۔