اسکاٹ لینڈ: مسجد پر حملے کی منصوبہ بندی کرنے والا 17 سالہ گرفتار

انورکلائیڈ(ڈیلی اردو) اسکاٹ لینڈ کے شہر انورکلائیڈ میں ایک 17 سالہ نوجوان کو اس وقت گرفتار کر لیا گیا جب وہ ایک مسجد پر دہشتگرد حملے کی منصوبہ بندی کر رہا تھا۔ مذکورہ لڑکا نوعمری سے ہی سوشل میڈیا پر دائیں بازو کی شدت پسندانہ ویڈیوز سے متاثر ہو کر وائٹ سپریمیسی اور انتہاپسند نظریات اپناتا رہا، اور اس نے اندرس بریوِک جیسے دہشتگرد کو اپنا ہیرو قرار دیا۔ اس نے مسجد میں داخل ہونے کے لیے جھوٹ بولا کہ وہ اسلام قبول کرنا چاہتا ہے، اور اندرونی ویڈیوز اور نقشے تیار کیے تاکہ نمازیوں کو نشانہ بنا کر عمارت کو نذرِ آتش کر سکے۔ پولیس نے بروقت کارروائی کرتے ہوئے مسجد کے باہر اسے گرفتار کر لیا، اس کے قبضے سے ایئرگن، گولیاں، آتش گیر مادہ، اور شدت پسندانہ لٹریچر برآمد ہوا، جبکہ گھر کی تلاشی کے دوران "Mein Kampf" اور "The Anarchist Cookbook" سمیت بم سازی سے متعلق مواد بھی ملا۔ عدالت میں اس نے اعتراف جرم کیا، جبکہ فیصلہ آئندہ ماہ سنایا جائے گا۔