آسٹریلوی حکومت کا حماس کو ‘دہشت گرد’ تنظیم قرار دینے کا فیصلہ

کینبرا (ج ح ط) آسٹریلیا بھی اسرائیل کے نقش قدم پر چل پڑا اور فلسطین کی مزاحمتی تنظیم حماس کو دہشت گرد قرار دینے کا اعلان کردیا۔

آسٹریلوی وزیر داخلہ کیرن اینڈریوز نے میڈیا کو بتایا کہ اپریل میں حماس تحریک کو آسٹریلیا کے تعزیراتی ضوابط کے تحت ایک دہشت گرد تنظیم قرار دیا جائے گا۔

ان کا کہنا تھا کہ آسٹریلوی حکومت تشدد کی ہر شکل کی مخالف ہے، جس کا مقصد آسٹریلوی شہریوں کو دہشت گردی اور پرتشدد شدت پسندی سے بچانا ہے۔

غیر ملکی میڈیا رپورٹس میں بتایا گیا کہ آسٹریلوی حکام کے مطابق اپریل میں حماس کو دہشت گرد تنظیم قرار دے دیا جائے گا، جسکے بعد مزاحمتی تنظیم حماس کی مالی امداد پر پابندی ہوگی۔

رپورٹس کے مطابق خلاف ورزی کرنے والوں کو 25 سال تک قید ہوسکتی ہے۔

دوسری جانب حماس نے آسٹریلوی اعلان کی شدید مذمت کرتے ہوئے کہا کہ اسرائیل کو دہشت گرد قرار دینا چاہیے تھا۔

آسڑیلوی حکومت نے امریکی پرتشدد نسل پرست گروہ نیشنل سوشلسٹ آرڈر اور شامی تنظیم حیات التحریر الشام کو بھی دہشت گرد تنظیموں کی فہرست میں شامل کر لیا ہے۔