اسرائیل نے غزہ میں پوری قوت سے جنگ دوبارہ شروع کر دی ہے، نتن یاہو

یروشلم (ڈیلی اردو) اسرائیلی وزیر اعظم بنیامن نتن یاہو کا کہنا ہے کہ اسرائیل نے عزہ میں ’پوری قوت کے ساتھ‘ دوبارہ لڑائی شروع کر دی ہے۔

غزہ میں جنوری کے دوران جنگ بندی پر اتفاق کیا گیا تھا تاہم اب اسرائیل نے دوبارہ حملے شروع کیے ہیں۔ حماس کے مطابق حملوں کی نئی لہر میں 400 سے زیادہ لوگ مارے گئے ہیں۔

نتن یاہو نے ان حملوں کا حوالے دیتے ہوئے کہا ہے کہ ’یہ صرف شروعات ہے‘ اور ان کے مطابق لڑائی اس وقت تک جاری رہے گی جب تک اسرائیل اپنے اہداف حاصل نہیں کر لیتا۔

اسرائیل نے اپنے تمام یرغمالیوں کی غزہ سے واپسی کا مطالبہ کیا ہے۔ اسرائیل کا خیال ہے کہ اب بھی غزہ میں 59 یرغمالی موجود ہیں جن میں سے 24 کے بارے میں خیال ہے کہ وہ زندہ ہیں۔ جنگ بندی معاہدے کے دوران حماس نے کئی یرغمالیوں کو رہا کیا تھا۔

اسرائیلی وزیر اعظم نے الزام لگایا کہ حماس جنگ بندی میں کی گئی پیشکش سے انکاری ہے۔ ان کا کہنا ہے کہ ’اب مذاکرات صرف آگ تلے ہوں گے۔‘

انھوں نے اسرائیلیوں کا شکریہ ادا کیا اور کہا کہ ’ہم مشرق وسطیٰ کو بدل رہے ہیں۔ ہم جیتیں گے۔‘

اس دوران اسرائیلی ڈیفنس فورسز (آئی ڈی ایف) اور اسرائیلی سکیورٹی ایجنسی نے ایک مشترکہ بیان میں کہا ہے کہ وہ غزہ میں ’دہشتگردوں کے اہداف‘ پر حملے جاری رکھیں گے۔

بیان میں مزید کہا گیا ہے کہ گذشتہ چند گھنٹوں کے دوران اسرائیلی فورسز نے ’دہشتگردوں کے سیلز، لانچ پوسٹس، اسلحے کے ذخائر اور اضافی فوجی انفراسٹرکچر‘ کو نشانہ بنایا ہے۔ اس وقت بھی اسرائیلی فورسز غزہ کی پٹی پر مختلف اہداف کو نشانہ بنا رہی ہیں۔

غزہ میں تازہ حملوں کے بعد انسانی بحران مزید شدت اختیار کر گیا ہے، جبکہ عالمی برادری کی جانب سے جنگ بندی کے مطالبات میں اضافہ ہو رہا ہے۔