اسرائیل نے غزہ پر حملے کی تیاری شروع کردی

تل ابیب (مانیٹرنگ ڈیسک) غزہ پر حالیہ اسرائیلی حملے میں اسلامی جہاد کے 3 کمانڈرز ، خواتین اور بچوں سمیت 13 فلسطینیوں کی ہلاکت کے بعد اسرائیل نے اب غزہ میں طویل مدتی حملے کی تیاری شروع کردی ہے۔

اسرائیلی میڈیا کی رپورٹ کے مطابق اسرائیلی فوج کے چیف آف سٹاف ہرزی حلیوی نے غزہ میں اسلامی جہاد کے 3 کمانڈرز اور 13 فلسطینیوں کی ہلاکت کے بعد سیکورٹی جائزے کے لیے اعلیٰ فوجی اور انٹیلی جنس رہنماؤں کے ساتھ ایک میٹنگ کی جس میں انہوں نے اسرائیلی حملے کیخلاف فلسطینی مزاحمتی گروپوں کے ممکنہ ردعمل پر تبادلہ خیال کیا۔

اسرائیلی فوج نے اپنے بیان میں بتایا کہ اجلاس میں مزاحمت کرنے والے فلسطینیوں کیخلاف ممکنہ پیش رفت اور اسرائیلی دفاعی فورسز کی تمام محاذوں پر تیاریوں اور اس کے ایکشن پلان پر توجہ مرکوز کی گئی۔

دریں اثنا محصور غزہ میں لڑائی کئی دنوں تک جاری رہنے کی توقع کے باعث اسرائیلی حکومت نے قرب و جوار میں غیرقانونی یہودی آبادیوں کو انخلا کا حکم دیا ہے۔

رپورٹ میں بتایا گیا کہ اسرائیل کے مرکز اور جنوب میں شہریوں کیلئے بم سے محفوظ پناہ گاہیں کھول دی گئی ہیں جبکہ ہسپتالوں کی انتظامیہ نے مریضوں کو محفوظ مقامات میں منتقل کرنا شروع کردیا ہے۔