اسرائیل نے مغربی کنارے میں 19 نئی بستیوں کی منظوری دے دی

یروشلم (ڈیلی اردو/اے پی) اسرائیل کی سکیورٹی کابینہ نے مقبوضہ مغربی کنارے (ویسٹ بینک) میں یہودی آباد کاروں کی 19 نئی بستیوں کی تعمیر کی منظوری دے دی ہے۔ یہ بات اتوار، 21 دسمبر کو جاری کردہ ایک سرکاری بیان میں بتائی گئی۔

یروشلم سے موصولہ اطلاعات کے مطابق اس فیصلے کے بعد گزشتہ تین برسوں کے دوران مقبوضہ فلسطینی علاقے میں جن نئی یہودی بستیوں کے قیام کی منظوری دی جا چکی ہے، ان کی مجموعی تعداد 69 ہو گئی ہے۔

وزیراعظم بینجمن نیتن یاہو کی کابینہ میں شامل انتہائی دائیں بازو سے تعلق رکھنے والے وزیرِ خزانہ بیزیل اسموٹریچ کے دفتر کی جانب سے جاری بیان میں کہا گیا ہے کہ وزیر خزانہ اسموٹریچ اور وزیر دفاع اسرائیل کاٹز کی جانب سے پیش کی گئی 19 نئی بستیوں کی تعمیر کی تجویز کو سکیورٹی کابینہ نے منظور کر لیا ہے۔ تاہم بیان میں یہ واضح نہیں کیا گیا کہ یہ فیصلہ کب کیا گیا۔

اسموٹریچ نے بیان میں کہا،“ہم زمینی حقائق کے ذریعے ایک دہشت گرد فلسطینی ریاست کے قیام کو روک رہے ہیں۔ ہم اس سرزمین پر اپنی تاریخی میراث کے طور پر تعمیر، ترقی اور آباد کاری کا عمل جاری رکھیں گے، اس یقین کے ساتھ کہ ہم جس راستے پر گامزن ہیں وہ انصاف کا راستہ ہے۔”

ادھر خبر رساں ادارے اے پی نے تل ابیب سے اپنی رپورٹ میں لکھا ہے کہ اسرائیل کی انتہائی دائیں بازو کی حکومت کا یہ تازہ اقدام مقبوضہ مغربی کنارے میں یہودی بستیوں کی تعمیر اور اس کی رفتار میں مزید اضافے کی کڑی ہے، جس سے مستقبل میں ایک آزاد فلسطینی ریاست کے قیام کے امکانات کو مزید خطرہ لاحق ہو گیا ہے۔