اسرائیلی فوج نے مغربی کنارے سے 25 فلسطینی اغوا کر لیے

مقبوضہ بیت المقدس (ڈیلی اردو) اسرائیلی فوج نے علی الصبح مغربی کنارے اور مقبوضہ بیت المقدس میں گھروں پر چھاپوں کے دوران متعدد فلسطینی شہری اغوا کر لیے۔

مقامی ذرائع نے اطلاع دی ہے کہ کم از کم 25 فلسطینی شہریوں، جن میں زیرحراست فلسطینی کی بیوی بھی شامل ہے، کو مقبوضہ بیت المقدس اور مغربی کنارے کے مختلف علاقوں میں ان کے گھروں سے اغوا کیا گیا۔

فلسطینی نوجوانوں اور اسرائیلی فوجیوں کے مابین پرتشدد جھڑپیں پھوٹ پڑیں جب اسرائیلی فوجیوں نے رملہ میں الطیرہ میں چھاپہ مارا۔

اسرائیلی فوجیوں نے فلسطینی نوجوانوں پر آنسو گیس کے گولے پھینکے اور ربڑ کے خول میں لپٹی دھاتی گولیوں سے بھاری فائرنگ کی۔ ان میں سے بہت سے لوگوں کو آنسو گیس کی وجہ سے دم گھٹنے کا سامنا کرنا پڑا اور انہیں موقع پر ہی طبی امدا مہیا کی گئی۔

بیت المقدس کے رہائشیوں نے مرکز اطلاعات فسلطین کو بتایا کہ اسرائیلی فوجیوں نے منگل کی رات بیت المقدس شہر کے شمال اور جنوب میں قلندیا اور کنٹینر چوکیوں کو اچانک بند کردیا اور فلسطینی شہریوں کی نقل و حرکت کو گھنٹوں روک دیا۔