اسرائیلی وزیراعظم کا لبنان میں حزب اللہ کے ٹھکانوں پر شدید حملوں کا حکم

یروشلم/بیروت (ڈیلی اردو) اسرائیلی وزیر اعظم بنیامین نیتن یاہو نے اسرائیلی دفاعی افواج (آئی ڈی ایف) کو لبنان میں حزب اللہ کے ٹھکانوں پر شدید حملے کرنے کا حکم دے دیا ہے۔

وزیر اعظم کے دفتر سے جاری بیان میں کہا گیا ہے کہ یہ کارروائی حزب اللہ کی جانب سے مبینہ خلاف ورزیوں کے جواب میں کی جا رہی ہے۔

اسرائیلی فوج (آئی ڈی ایف) نے ہفتے کے روز ٹیلیگرام پر متعدد بیانات میں دعویٰ کیا کہ حزب اللہ کی جانب سے اسرائیل اور لبنان کے درمیان حالیہ جنگ بندی کی خلاف ورزیاں کی جا رہی ہیں۔

آئی ڈی ایف کے مطابق جنوبی لبنان میں حزب اللہ کے مبینہ ڈھانچوں کو نشانہ بنایا جا رہا ہے تاکہ اسرائیلی فوجیوں اور شہریوں کے لیے لاحق خطرات کو ختم کیا جا سکے۔ اسرائیلی فوج کا کہنا ہے کہ حزب اللہ ان مقامات کو اسرائیل کے خلاف حملوں کی تیاری کے لیے استعمال کر رہی تھی۔

دوسری جانب اسرائیلی فوج نے دعویٰ کیا ہے کہ لبنان سے اسرائیلی علاقے کی جانب دو راکٹ فائر کیے گئے، جن میں سے ایک کو دفاعی نظام نے راستے میں ہی تباہ کر دیا جبکہ دوسرا کھلے علاقے میں جا گرا۔ اس واقعے میں کسی جانی نقصان کی اطلاع نہیں ملی۔

اسرائیل نے ان راکٹ حملوں کو جنگ بندی معاہدے کی خلاف ورزی قرار دیا ہے، جبکہ حزب اللہ کی جانب سے اس واقعے پر فوری طور پر کوئی ردعمل سامنے نہیں آیا۔

یہ پیش رفت ایسے وقت میں سامنے آئی ہے جب خطے میں کشیدگی پہلے ہی برقرار ہے اور فریقین ایک دوسرے پر جنگ بندی معاہدے کی خلاف ورزی کے الزامات عائد کر رہے ہیں۔

یاد رہے کہ اس سے قبل امریکی صدر ڈونلڈ ٹرمپ نے بھی اعلان کیا تھا کہ اسرائیل اور لبنان کے درمیان جنگ بندی میں تین ہفتوں کی توسیع کی گئی ہے، تاہم زمینی صورتحال میں کشیدگی بدستور برقرار ہے۔