اسلام آباد: امریکی سفارتخانے کا بیان داخلی امور میں مداخلت قرار

اسلام آباد (ڈیلی اردو) قومی اسمبلی کی قائمہ کمیٹی برائے داخلہ نے امریکی سفارتخانے کی طرف سے اسلام آباد کے بعض سیکٹرز میں جرائم کی شرح بڑھنے کے خدشات پر شدید برہمی کا اظہار کرتے ہوئے اسے پاکستان کے داخلی امور میں مداخلت قرار دیا ہے۔

تفصیلات کے مطابق قومی اسمبلی کی قائمہ کمیٹی برائے داخلہ کا اجلاس چیئرمین کمیٹی راجہ خرم نواز کی زیر صدارت ہوا،اجلاس میں ڈی آئی جی آپریشنز اسلام آباد وقار الدین سید نے کمیٹی کو بریفنگ دیتے ہوئے بتایا کہ امریکی سفارتخانہ کی طرف سے اسلام آباد میں جرائم سے متعلق جو خدشات ظاہر کئے وہ درست نہیں، امریکی سفارتخانہ کے خدشات سے معاشرے پر منفی اثرات مرتب ہوئے، سفارتخانہ سے دفتر خارجہ کے ذریعے تفصیلات مانگی گئی ہیں، امریکی سفارتخانہ نے مخصوص سیکٹرز میں جرائم سے متعلق رپورٹ دی جو درست نہیں۔

ڈی آئی جی آپریشنز وقار الدین سید نے بتایا کہ امریکی سفارتخانہ نے جن سیکٹرز کی نشاندہی کی ہے وہاں جرائم کی شرح انتہائی کم ہے، برطانیہ اور یورپی ممالک نے اسلام باد کو محفوظ شہر قرار دیا ہے، اقوام متحدہ نے اسلام آباد کو فیملی اسٹیشن قرار دیا ہے، غیر ملکی سفارتخانوں نے اسلام آباد پولیس کی کاوشوں کو سراہتے ہوئے تعریفی خطوط لکھے ہیں، انسداد جرائم اور سیکیورٹی صورتحال کی بہتری پر غیر ملکی سفارتخانوں نے اطمینان کا اظہار کیا ہے۔

ارکان کمیٹی نے کہا کہ امریکی سفارتخانہ ہمارے داخلی امور میں کیوں مداخلت کر رہا ہے، قائمہ کمیٹی میں بچوں سے زیادتی کا معاملہ بھی زیر بحث آیا، کمیٹی نے بچوں ذخیرہ اندوزی اور پرائس کنٹرول سے متعلق بل کمیٹی میں زیر بحث آیا جسے کمیٹی نے منظور کرلیا۔