افغانستان : بدخشاں میں سابق جنرل گرفتار، فضائی حملے میں 3 افراد زخمی

کابل (ڈیلی اردو) افغانستان کے صوبہ بدخشان میں طالبان نے سابق فوجی جنرل جلیل کو گرفتار کرلیا۔

مقامی ذرائع کے مطابق طالبان نے جمعہ کے روز ضلع شکی کے گاؤں ژرف سے سابق فوجی جنرل جلیل کو حراست میں لیا۔ ذرائع کا کہنا ہے کہ انہیں طالبان کی خصوصی یونٹ نے گرفتار کرکے نامعلوم مقام پر منتقل کردیا ہے۔

ذرائع کے مطابق طالبان نے آج ضلع نسی میں گھروں کی تلاشی کا سلسلہ بھی شروع کیا ہے۔ بدخشان میں طالبان اور ناراض کمانڈر جمعہ فاتح کے جنگجوؤں کے درمیان گزشتہ منگل سے جھڑپیں جاری ہیں۔

رپورٹس کے مطابق لڑائی کے دوران طالبان کا ایک ہیلی کاپٹر بھی گرایا گیا، جس میں سوار 7 افراد ہلاک ہوئے۔

بدخشان: طالبان کی فضائی کارروائی، 3 افراد زخمی

افغانستان کے صوبہ بدخشان میں طالبان کی جانب سے ضلع نسی کے گاؤں قوغذ میں جمعہ فاتح کے ٹھکانوں پر فضائی حملے کیے گئے، جن کے نتیجے میں 3 افراد زخمی ہوگئے۔

مقامی ذرائع نے بتایا کہ طالبان نے ناراض کمانڈر جمعہ فاتح کے جنگجوؤں کے ٹھکانوں کو فضائی حملوں کا نشانہ بنایا۔ ذرائع کے مطابق گزشتہ روز ضلع نسی میں طالبان جنگجوؤں کی ہلاکتوں میں اضافے کی اطلاعات کے بعد طالبان نے کارروائیاں تیز کردی ہیں۔

ذرائع کا کہنا ہے کہ طالبان اپنے ہلاک اور زخمی جنگجوؤں کو گزشتہ شب 25 سے زائد گاڑیوں کے ذریعے ضلع نسی سے شکی منتقل کرچکے ہیں۔

بدخشان میں طالبان اور جمعہ فاتح کے جنگجوؤں کے درمیان گزشتہ منگل سے جاری جھڑپیں تاحال جاری ہیں۔