امریکا کی غنڈہ گردی کا فیصلہ کن جواب دیں گے، ایرانی صدر حسن روحانی

تہران (ڈیلی اردو) ایران نے کہا ہے کہ امریکا نے روایتی غنڈہ گردی کا مظاہرہ کرتے ہوئے یک طرفہ طور پر اقوام متحدہ کی پابندیاں بحال کیں جس پر اُسے فیصلہ کن جواب دینے کا وعدہ کرتے ہیں۔

ایرانی صدر حسن روحانی نے ایران پر اقوام متحدہ کی پابندیوں کو بحال کرنے کے لئے امریکی دباؤ کی مزاحمت کرنے پر عالمی طاقتوں کا شکریہ ادا ہوئے کہا کہ امریکا کا ایران کے خلاف زیادہ سے زیادہ دباؤ خود امریکا کے لیے زیادہ سے زیادہ تنہائی کا باعث ہوگا۔

صدر حسن روحانی نے مزید کہا کہ آج کا دن ایران کی تاریخ کا یادگار ترین ہے، عالمی قوتوں نے ہمارا ساتھ کر جس اعتماد کا اظہار کیا ہے اس سے امریکا کو عالمی سطح پر سبکی کا سامنا کرنا پڑا ہے اور یہ ہماری اب تک کی سب سے بڑی کامیابی ہے۔

امریکا نے گزشتہ روز یک طرفہ طور پر ‘اسنیپ بیک’ طریقہ کار کے ذریعے ایران پر عائد اقوام متحدہ کی پابندیوں کو بحال کردیا تھا تاہم سلامتی کونسل کے دیگر ارکان نے اس کی حمایت نہیں کی تھی اور امریکی اقدام کو شدید تنقید کا نشانہ بنایا تھا۔