امریکی سینٹ کام نے ایرانی بندرگاہ جانے والے بحری جہاز کو میزائل سے نشانہ بنادیا

واشنگٹن(ڈیلی اردو) امریکی سینٹرل کمانڈ (سینٹ کام) نے دعویٰ کیا ہے کہ امریکی فورسز نے خلیج عمان سے ایران کی جانب جانے والے ایک تجارتی بحری جہاز کو روکنے کے بعد اسے ناکارہ بنا دیا۔

سینٹ کام کے مطابق پاناما کا پرچم بردار یہ جہاز ایرانی بندرگاہ کی طرف بڑھ رہا تھا اور مبینہ طور پر امریکی بحری ناکہ بندی کی خلاف ورزی کرنے کی کوشش کر رہا تھا۔

امریکی کمانڈ کا کہنا ہے کہ جہاز کے سویلین عملے کو متعدد مرتبہ راستہ تبدیل کرنے کی ہدایات دی گئیں، تاہم عملے کی جانب سے تنبیہات پر عمل نہ کیے جانے کے بعد امریکی بحریہ کے ایک ایم ایچ-60 ہیلی کاپٹر نے جہاز کے انجن روم کو دو ہیل فائر میزائلوں سے نشانہ بنایا۔

سینٹ کام نے اپنے بیان میں کہا کہ کارروائی کے بعد مذکورہ بحری جہاز اب ایران کی جانب سفر نہیں کر رہا۔

امریکی حکام کے مطابق 11 اگست تک مجموعی طور پر 55 تجارتی بحری جہازوں کا رخ تبدیل کیا جاچکا ہے، جبکہ تعاون نہ کرنے والے تین جہازوں کو ناکارہ بنایا گیا اور مزید دو بحری جہازوں کی تلاشی لی گئی ہے۔

سینٹ کام کے بیان میں کارروائی کی مزید تفصیلات یا جہاز کو پہنچنے والے نقصان کی مکمل نوعیت کے بارے میں معلومات فراہم نہیں کی گئیں۔