امریکی صدر ٹرمپ کا سعودی عرب کو ایف-35 لڑاکا طیارے فروخت کرنے کا اعلان

واشنگٹن (نمائندہ ڈیلی اردو)  وائٹ ہاؤس میں امریکی صدر ڈونلڈ ٹرمپ اور سعودی ولی عہد محمد بن سلمان کی ملاقات کے بعد صدر ٹرمپ نے اعلان کیا ہے کہ امریکہ سعودی عرب کو ایف-35 سٹیلتھ لڑاکا طیارے فروخت کرے گا۔

صدر ٹرمپ نے صحافیوں کو بتایا کہ سعودی عرب ایک اہم اتحادی ہے اور اس معاہدے کے ذریعے ریاض کو خلیج فارس میں اپنے علاقائی حریفوں بشمول ایران پر فضائی برتری حاصل ہوگی۔ ملاقات میں دفاع اور سویلین نیوکلیئر معاہدوں کے معاملات بھی زیر غور آئے۔

ملاقات کے بعد سعودی ولی عہد محمد بن سلمان نے کہا کہ وہ امریکہ میں 600 ارب ڈالر کی سرمایہ کاری کو 10 کھرب ڈالر تک بڑھائیں گے، جس پر صدر ٹرمپ نے انہیں داد دی اور کہا کہ یہ اعزاز کی بات ہے کہ ولی عہد ان کے دوست ہیں۔

صحافی جمال خاشقجی کے قتل کے حوالے سے صدر ٹرمپ نے کہا کہ سعودی ولی عہد کو معاملے میں "کچھ بھی معلوم نہیں تھا"، جبکہ ولی عہد نے تحقیقات کے دوران کیے گئے اقدامات کی وضاحت کرتے ہوئے کہا کہ ایسے واقعات دوبارہ نہ ہوں۔

ملاقات میں ابراہیم معاہدہ اور دو ریاستی حل سمیت خطے کے دیگر دفاعی و سیاسی مسائل پر بھی بات ہوئی، جس کے بارے میں صدر ٹرمپ نے کہا کہ وہ دفاعی معاہدے پر "کافی حد تک" پہنچ چکے ہیں اور دونوں رہنماؤں کے درمیان اس بارے میں "بہت اچھی بات چیت" ہوئی۔