امریکی مذاکرات: ایرانی وزیر خارجہ عباس عراقچی اسلام آباد پہنچ گئے

اسلام آباد (ڈیلی اردو) ایرانی وزیر خارجہ عباس عراقچی ایک اعلیٰ سطحی وفد کے ہمراہ اسلام آباد پہنچ گئے ہیں، جہاں وہ پاکستانی قیادت سے اہم ملاقاتیں کریں گے۔

پاکستانی دفتر خارجہ کے مطابق عباس عراقچی اپنے دورے کے دوران پاکستان کی اعلیٰ قیادت سے ملاقاتیں کریں گے، تاہم دورے کی مدت کے بارے میں تفصیلات فراہم نہیں کی گئیں۔

پاکستان آمد پر ایرانی وزیر خارجہ کا استقبال نائب وزیر اعظم اور وزیر خارجہ اسحاق ڈار، فیلڈ مارشل عاصم منیر سمیت دیگر اعلیٰ حکام نے کیا۔

اسلام آباد میں ایرانی سفارتخانے کے مطابق عباس عراقچی کا دورہ دوطرفہ تعلقات کا جائزہ لینے اور خطے کی تازہ پیش رفت پر مشاورت کے لیے ہے۔ 

ایرانی سرکاری خبر رساں ایجنسی ارنا کے مطابق عراقچی پاکستان کے علاوہ عمان اور روس کا بھی دورہ کریں گے، جہاں وہ خطے کی صورتحال اور امریکہ و اسرائیل کے ساتھ کشیدگی پر بات چیت کریں گے۔

ایرانی وزیر خارجہ نے سماجی رابطے کی ویب سائٹ ایکس پر کہا کہ ان دوروں کا مقصد علاقائی شراکت داروں کے ساتھ قریبی رابطہ اور موجودہ پیش رفت پر مشاورت ہے۔

ادھر ایرانی وزارت خارجہ کے ترجمان اسماعیل بقائی نے واضح کیا ہے کہ اسلام آباد میں ایرانی وزیر خارجہ کی امریکی وفد سے کوئی ملاقات متوقع نہیں۔ ان کے مطابق ایران اپنے مؤقف سے پاکستان کو آگاہ کرے گا اور دورے کا مقصد جنگ کے خاتمے اور علاقائی امن پر بات چیت ہے۔

تسنیم نیوز ایجنسی کے مطابق اس وقت ایران اور امریکہ کے درمیان براہ راست مذاکرات کا کوئی باضابطہ ایجنڈا اسلام آباد دورے کا حصہ نہیں ہے، جبکہ یہ دورہ بنیادی طور پر پاکستان کے ساتھ مشاورت اور خطے کی صورتحال پر توجہ مرکوز رکھتا ہے۔

یاد رہے کہ امریکی میڈیا نے دعویٰ کیا تھا کہ اسلام آباد میں امریکی اور ایرانی وفود کے درمیان بالواسطہ یا براہ راست ملاقات ہو سکتی ہے، تاہم ایرانی حکام نے اس کی تردید کی ہے۔