امن مذاکرات میں واشنگٹن تہران کا اعتماد جیتنے میں ناکام رہا، باقر قالیباف

تہران (ڈیلی اردو) موجودہ ویک اینڈ پر پاکستان کے دارالحکومت اسلام آباد میں ایران اور امریکہ کے مابین ہونے والے امن مذاکرات میں تہران کے وفد کی قیادت کرنے والے ایرانی پارلیمان کے اسپیکر محمد باقر قالیباف نے کہا ہے کہ اس مکالمت میں امریکہ ایران کا اعتماد جیتنے میں ناکام رہا۔

دونوں ممالک کے وفود اسلام آباد میں کل ہفتہ 11 اپریل کے روز اکیس گھنٹے تک جاری رہنے والی بات چیت کے تین ادوار میں شرکت اور کسی ٹھوس نتیجے تک پہنچنے میں ناکامی کے بعد اتوار 12 اپریل کی صبح واپس چلے گئے تھے۔

اس پس منظر میں ایرانی پارلیمان کے اسپیکر محمد باقر قالیباف نے سوشل میڈیا پلیٹ فارم ایکس پر اپنی ایک پوسٹ میں آج لکھا، ’’ایرانی وفد میں شامل میرے ساتھیوں نے مذاکرات میں آگے بڑھنے کی نیت سے مثبت پیش رفت دکھائی، لیکن آخر کار دوسرا فریق مکالمت کے ان ادوار میں ایرانی وفد کا اعتماد حاصل کرنے میں ناکام رہا۔‘‘

قالیباف نے اپنی پوسٹ میں ’’مکالمت کے ان ادوار‘‘ کا ذکر کیا، لیکن یہ نہیں لکھا کہ آیا یہ ایران کی امریکہ کے ساتھ کوئی آخری مکالمت تھی یا اس کے بعد کوئی نئی بات چیت نہیں ہو گی۔