اورکزئی میں 2 افراد کی لاشیں برآمد، ٹانک میں مسجد کے اندر پولیس اہلکار کی ٹارگٹ کلنگ

کلایہ + ٹانک (نمائندگان ڈیلی اردو) پاکستان کے شورش زدہ صوبے خیبر پختونخوا کے قبائلی ضلع اورکزئی اور ضلع ٹانک میں فائرنگ اور تشدد کے الگ الگ واقعات میں 3 افراد ہلاک ہو گئے، جب کہ سیکیورٹی فورسز نے دونوں علاقوں میں سرچ آپریشن شروع کر دیا ہے۔

پولیس کے مطابق ضلع اورکزئی کے علاقے ماموزئی جندری پہاڑ سے دو افراد کی لاشیں برآمد ہوئیں جن پر گولیوں کے نشانات واضح تھے۔

ہلاک ہونے والوں کی شناخت عبداللہ اور فضل حنان سکنہ ماموزئی کے ناموں سے ہوئی ہے۔ پولیس کا کہنا ہے کہ دونوں کو فائرنگ کرکے ہلاک کیا گیا۔

لاشوں کو ضابطے کی کارروائی کے لیے قریبی ہسپتال منتقل کر دیا گیا ہے جبکہ واقعے کی نوعیت اور محرکات کے بارے میں تحقیقات جاری ہیں۔

ٹانک مسجد میں فائرنگ

ادھر ضلع ٹانک کے علاقے گاؤں گیدڑی ابی زر میں نماز کے مقام پر فائرنگ کا واقعہ پیش آیا جس میں ایک پولیس اہلکار ہلاک ہوگیا۔ واقعہ تھانہ گل امام کی حدود میں پیش آیا۔

پولیس ذرائع کے مطابق موٹر سائیکل سوار نامعلوم مسلح افراد مسجد کے اندر داخل ہوئے اور فائرنگ کر دی، جس کے نتیجے میں شاہ نواز نامی پولیس کانسٹیبل موقع پر ہی ہلاک ہو گیا۔

ہلاک اہلکار چھٹی پر گھر آیا ہوا تھا جب اسے نشانہ بنایا گیا۔

واقعے کے بعد پولیس اور سیکیورٹی فورسز کی بھاری نفری علاقے میں پہنچ گئی اور سرچ آپریشن شروع کر کے شواہد اکٹھے کر لیے گئے ہیں۔

مقامی انتظامیہ کے مطابق دونوں واقعات کی تفتیش جاری ہے اور حملہ آوروں کی گرفتاری کے لیے کارروائیاں تیز کر دی گئی ہیں۔