اورکزئی میں سیکیورٹی فورسز کا آپریشن، 9 پاکستانی طالبان ہلاک

واشنگٹن (ش ح ط)  پاکستان کے شورش زدہ صوبے خیبر پختونخوا کے قبائلی ضلع اورکزئی کے علاقے غلجو میں سیکیورٹی فورسز نے خفیہ اطلاع پر کارروائی کرتے ہوئے تحریک طالبان پاکستان (ٹی ٹی پی) سے منسلک دہشت گردوں کے ٹھکانوں پر ٹارگیٹڈ آپریشن کیا۔

عسکری ذرائع کے مطابق کارروائی کے دوران دو گھنٹے تک شدید فائرنگ کا تبادلہ ہوا، جس میں 9 شدت پسند ہلاک اور متعدد زخمی ہوئے۔

سیکیورٹی فورسز نے علاقے سے بڑی مقدار میں اسلحہ اور بارودی مواد بھی برآمد کیا۔

آپریشن کے بعد علاقے میں سرچ آپریشن جاری ہے اور داخلی و خارجی راستے سیل کر دیے گئے ہیں۔

ادھر صبح سویرے اورکزئی کے علاقے غلجو کی محمودزئی پوسٹ پر پاکستانی طالبان کے حملے میں 8 فرنٹیئر کور کے اہلکار ہلاک اور کئی زخمی ہو گئے ہیں۔

اورکزئی کے علاقے ماموزئی میں فرنٹیئر کور کے ہلاک ہونے والے 7 اہلکاروں کی نماز جنازہ ادا کر دی گئی۔

نماز جنازہ اورکزئی اسکاوٹس ہیڈ کوارٹر میں ادا کی گئی، جس میں بریگیڈیئر خرم، کمانڈنٹ اورکزئی سکاؤٹس کرنل مدثر احمد، ڈپٹی کمشنر عرفان الدین سمیت علاقہ مشران نے شرکت کی۔

نماز جنازہ کے موقع پر قبائلی عمائدین نے امن کے لیے سیکیورٹی فورسز کی قربانیوں کو سراہا اور جوانوں کو خراجِ عقیدت پیش کیا۔

نماز جنازہ کے بعد اہلکاروں کی لاشوں کو تدفین کے لیے ان کے آبائی علاقوں کو روانہ کر دیا گیا۔