اٹک: شجاع خانزادہ حملے میں ملوث تحریک طالبان پاکستان کا ‘انتہائی مطلوب دہشت گرد’ ہلاک

لاہور (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) نے خفیہ معلومات ملنے پر بڑی کارروائی کی، کارروائی کے دوران سابق صوبائی وزیر داخلہ کرنل (ر) شجاع خانزادہ پر حملہ کرنے والا کالعدم تنظیم تحریک طالبان پاکستان کا دہشتگرد مارا گیا۔

تفصیلات کے مطابق کاؤنٹر ٹیررازم ڈیپارٹمنٹ نے صوبہ پنجاب کے ضلع اٹک میں بروقت کارروائی کی، سی ٹی ڈی کو اطلاع ملی کہ کالعدم تنظیم کے دہشتگرد بڑی کاروائی کرنے کے لیے اٹک میں موجود ہیں۔

سی ٹی ڈی نے چھاپہ مارا تو دہشتگردوں نے فائرنگ اور ہینڈ گرینڈ پھینکے۔ دہشتگروں کی اپنی فائرنگ سے ایک دہشتگرد نیاز ہلاک جبکہ تین فرار ہو گئے۔ مارا جانے والا دہشتگرد سابق صوبائی وزیر داخلہ کرنل (ر) شجاع خانزادہ پر حملہ کرنے میں ملوث تھا۔

ہلاک ہونے والا دہشتگرد کالعدم جماعت کا کارکن تھا اور اس نے 2014ء میں دو درجن سے زائد شہریوں کو قتل کیا تھا۔ نیاز کے سر کی 60 لاکھ قیمت مقرر تھی۔ دہشتگرد کے پاس سے بارودی مواد اور اسلحہ برآمد ہوا ہے۔